Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxx. Capittel.

1

⁺ DIt zijn de woorden Agur des soons Iake, Leeringhe ende redene des Mans Leithiel, Leithiel ende Vchal.

+ A vers 1

2

Want ick ben de alder sotste, ende menschen verstant en is niet by my:

3

Ick en hebbe gheen wijsheydt gheleert, ende wat heylich sy, en weet ic niet.

4

Wie vaert opwaerts inden Hemel, ende daer af? Wie vaet den wint in zijn handen? Wie bindet de wateren in een cleedt? Wie heeft alle de eynden der werelt ghesettet? Hoe heet hy? Ende hoe heet sine soon? Weet ghy dat?

5

Alle^* woorden Godts zijn doorloutert ende zijn eenen schilt den ghenen die daer op betrouwen.

* Psal. 7.a.12. 18.c.31. 19.b.9. 119.f.140.

6

En^† doet niet tot sinen woorden, op dat hy v niet en straffe, ende wordet lueghenachtich beuonden.

† Deut. 4.a.2 12.d.32.

7

Tweederley bidde ic van v, die en wilt my doch niet weygheren, eer ic sterue:

8

Afgoderije ende lueghenen laet verre van my zijn: Armoede^† ende rijckdomme en gheeft my niet. Maer laet my mijn bescheyden deel spijse wech nemen.

† Eccle. 27.a.4 Prou. 20.c.21. 23.a.4. 28.c.20 Iere. 17.b.11. 1.Tim. 6.b.9.

9

Ick mocht v anders,^* waert dat ic te sadt worde, versaken ende segghen: Wie is de HEEre? Oft waert dat ick te arm worde, mochte ic stelen, ende my aen den Naem mijns Godts vergrijpen.

* Deut. 8.c.12 32.e.20.

10

En verraet den knecht niet teghen sinen Heere, hy mocht v vloecken, ende ghy moest de schult draghen.

11

^* Daer is eenen aert die haren Vader vloect, ende hare Moeder niet en segent.

* Exod. 21.b.17 Deut. 27.c.16 Math. 15.a.4

12

Eenen aert die haer reyn laet duncken, ende en is nochtans van haren drec niet ghewasschen.

13

⁺ Eenen aert,^* die haer ooghen hooch draecht, ende haer ogensceelen hooch opheft.

+ B vers 13

* Psal. 18.c.28. Prou. 6.b.17.

14

Eenen aert, die Sweerden voor tanden heeft,^† Die met haren kaecktanden verslindet ende verteeret de ellendighe inden lande, ende de armen onder de lieden.

† Psalm. 10.b.8 Esaie. 3.c.14.

15

Den Eghel heeft twee dochteren: Brengt herwaerts, brengt herwaerts. Drie dinghen en zijn niet te versaden, ende dat vierde en seyt niet: Het is ghenoech:

16

^† De Helle, der vrouwen toegesloten moeder, De Aerde en wort des waters niet sat, Ende dat vier en seyt niet: Het is ghenoech.

† Prou. 27.c.20

17

^† Een ooghe dat den Vader bespottet, ende veracht de Moeder haer ghehoor te gheuen, dat moeten de Rauens aen die beken wt picken, ende de Ionghe Aernen verslinden.

† Exod. 21.b.17 Deut. 27.c.16.

18

Drie dinghen zijn my te wonderlijc, ende dat vierde en weet ic niet,

19

^† Des Aerns wech inden Hemel, der Slangen wech op eenen steen,^* des schips wech midden inde zee, ende eens Mans wech tot een meysken,

† Sapi. 5.b.11.

* Sapi. 5.b.10.

20

Alsoo is oock den wech der Ouerspeeldersse, die verslint ende wischt haren mont, ende seyt: Ic en hebbe niet quaets ghedaen.

21

⁺ Een Lant wordt door driederley onrustich, ende dat vierde en macht niet verdraghen.

+ C vers 21

22

^† Een knecht, ist dat hy Coninc wert, een Sot, als hy te sadt broots is,

† 3.Reg. 11.c.29.

23

Een boose vrouwen persoone, als si ghetrout wordt, ende een Maerte, als die haerder vrouwen erfghenaem wordt.

24

Vier dinghen zijn cleyn op Aerden, ende cloecker dan de wijse,

25

^† De Mieren, een swack volck, Nochtans bereyden si haer spijse inden Somer.

† Prou. 6.a.6. Eccle. 10.e.38.

26

De Caninen een swack volck, Nochtans leytet zijn huys inde steenrootsen.

27

De sprinckhanen en hebben gheenen Coninc, nochtans trecken si wt met gantschen hoopen.

28

De Spinne wercket met haren handen, ende is inder Coninghen Palleysen.

29

Driederley hebben eenen fijnen ganc, Ende dat vierde gaet gheheel wel.

30

De Leeu machtich onder de dieren, Ende en keert niet om voor yemanden.

31

Eenen Haeswinde van goeden lendenen, ende eenen Ram, Ende de Coninck, tegen welcken hem niemant en derf setten.

32

Hebt ghy^† ghenarret ende hooch henen geuaren, ende wat quaets voor gehadt, soo legt de hant opten mont.

† Sottelijck ghedaen.

33

Alsmen melck stootet, so maectmen boter daer wt. Ende wie de nuesen herde snuyt, die dwingt daer bloet wt. Ende wie de toornicheydt verweckt, die dwinghet daer twist wt.