Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxix. Capittel.

1

⁺ VVie^† teghen de straffinge hartneckich is, Die sal onuerhuets verderuen, sonder alle hulpe.

+ A vers 1

† Prou. 5.c.23. 15.b.10. Sapi. 3.c.11.

2

^‡ Wanneer der gerechtiger veel is, so verblijdet hem dat volc: Mer als de Godloose heerschapt, soo suchtet dat volck.

‡ Pro. 28.b.12 d.28.

3

Wie wijsheydt lief heeft, die verblijdet sinen Vader:^† Maer so wie hem met Hoeren geneert, die wort zijn goet quijt.

† Prou. 5.b.11. Luce. 15.b.13.

4

Een Coninck recht dat landt op, door dat recht: Maer die ghierich is, die verderftet.

5

Wie met sinen naesten^† flatteert, die breydet een Nette wt tot zijnen voetstappen.

† Huychelt.

6

Als een boose mensche sondicht,^* soo bestrict hy hem seluen: Maer een Rechtuaerdich mensce verblijt hem, ende heeft ghenoechte.

* Prou. 5.c.22. 11.a.6. Psal. 9.c.17.

7

De Rechtuaerdighe bekennet de sake der Armen: De Godloose en achtet geen vernuft.

8

^* De bespotters brenghen coenlijc een stadt in ongheluc:^† Maer de Wijsen, stillen de toornicheyt.

* Iudic. 8.b.6.

† Gen. 18.c.23

9

^† Wanneer een wijs man, met eenen Sotte te handelen coemt, Hy sy gram oft lacche, soo en heeft hy gheen ruste.

† 2.Reg. 20.b.9

10

⁺ De bloetghierighe haten den vroomen: Maer de Rechtuaerdighe soecken sine siele.

+ B vers 10

11

Een Sot giet sinen gheest gants wt: Maer een wijs man hout hem in.

12

^* Een Heere die lust tot luegen heeft, dies dienaren zijn altemael Godtloos.

* Eccle. 10.a.4.

13

Een arm man, ende een rijcke gemoeten hen onder malcanderen: Mer beyder ooghen verlicht de HEEre.

14

^† Een Coninck die den Armen ghetrouwelijck oordeelt, dies throon sal eewelijck staende blijuen.

† Prou. 20.d.28

15

^* De Roede ende straffinghe gheeft wijsheyt: Maer een Ionghelinc hem seluen ghelaten, scheyndet sine moeder.

* Eccle. 30.a.1. Prou. 13.c.24 19.b.13. 23.b.13

16

Waer veel Godtloosen zijn, daer zijn veel sonden: Maer de Rechtuaerdige sullen haren val verleuen.

17

^† Castijt uwen soon, so sal hy v verhueghen, Ende sal uwer sielen saecht doen.

† Eccle. 30.a.1. Prou. 13.c.24 23.b.13.

18

^* Als de Prophecie wt is, soo wordt dat Volck wildt ende woest: Maer wel dien, die de Wet hanthauet.

* Esaie. 3.a.3.

19

⁺ Een knecht en laet hem niet met woorden castijen, Want al verstaet hijt al schoon, soo en neemt hy hem doch dies niet aen.

+ C vers 19

20

Siet ghy eenen, die snel is om te spreken, So is aen eenen Sot meer hopens, dan aen hem.

21

Wanneer een knecht van ioncx op^† teerkens ghehouden wort, So wil hy daer nae een Ioncheer zijn.

† Verweent.

22

Een toornich man beroct kijuagie: Ende een verbolghen man doet veel sonden.

23

De houaerdicheydt des menschen sal hem ter neder worpen:^* Maer den nederen moet sal eere ontfanghen.

* Iob. 22.c.29. 1.Pet. 5.a.5.

24

Wie met dieuen een deel heeft,^† Hooret lasteren, ende en geeft dat niet te kennen, die hatet zijn leuen.

† Leuit. 5.a.1.

25

Menschen ontsien, brengt te valle: Maer wie hem op den HEEre verlaet, die wordt beschermt.

26

Veel soecken dat aensicht eens Vorsten: Maer eens yegelijcx oordeel coemt vanden HEERE.

27

Een onrechtuaerdich man, is den

[p. 234v]

Rechtuaerdighen eenen grouwel:^† Ende wie recht van weghe is, die is des Godloosens grouwel.

† Sapi. 2.c.15. Prou. 19.c.19.