Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxviij. Capittel.

1

⁺ DE Godloose^† vlucht, ende niemandt en iaecht hem: Mer de Rechtuaerdighe is vrijmoedich, ghelijc eenen Ionghen Leeu.

+ A vers 1

† Leuit. 26.f.36

2

Om des lants sonden wille, worden veel veranderinghe der Vorstemdommen: Maer om der lieden wille, die verstandich ende vernuftich zijn, blijuen sy langhe leuendich.

3

Een arm man, die de verachte beswaert, is ghelijck eenen Meeldauwe die de vruchten verderft.

4

Die de Wet verlaten, louen den Godloosen: Maer diese bewaren, die zijn onwillich op hen.

5

^‡ Quade lieden en mercken niet op dat recht: Maer die nae den HEERE vraghen, die mercken op alle dinck.

‡ 1.Cor. 2.b.14.

6

^† Een arm man die in zijnder vroomheyt gaet, is beter dan een rijck man, die in verkeerden weghen gaet.

† Prou. 19.a.1. Eccle. 19.d.23.

7

Wie de Wet bewaert, dat is een verstandich kint: Maer wie sluymers voedet, die scheyndet sinen Vader.

8

Wie zijn goet vermeerdert met woec-

[p. 234r]

ker, ende ouersettinge, die vergaderet tot profijte der Armen.

9

^+* Wie sine ooren afkeert de Wet te hooren, dies ghebet is eenen grouwel.

+ B vers 9

* Prou. 1.b.24.

10

^† Wie de vrome verleyt op eenen quaden wech, die sal in zijnen Cuyl vallen: Maer de vrome sullen dat goet beeruen.

† 3.Reg. 13.c.18. Iere. 23.

11

Een Rijck Man laet hem duncken, dat hy wijs is: Maer een arm verstandich man, merct op hem.

12

^† Als de Rechtuaerdige de ouerhant hebben, soo gatet seer fijn toe: Maer als de godloose op comen, so veranderet metten Lieden.

† Prou. 28.d.28 29.a.2.

13

^* Wie sine misdaet versaket, dien en salt niet wel ghelucken: Maer wiese bekent, ende laet, die sal ontfermherticheyt vercrijghen.

* Iob. 13.b.15. Psal. 32.a.5.

14

Wel dien, die altoos vreest: Maer wie hartneckich is, die sal in ongeluc vallen.

15

^+† Een godloose die ouer een arm volc regeert, dat is eenen briesschenden Leeu, ende ghierighen^† Beyre.

+ C vers 15

† Prou. 19.b.12

† Danie. 7.a.5. Eccle. 10.c.12.

16

Als een Vorst sonder verstant is, soo gheschieter veel onrechts: Maer soo wie de ghiericheyt haet, die sal langhe leuen.

17

^† Een mensche die aent bloet zijnder sielen onrecht doet, die en wordt niet onderhouden, al waert dat hy oock inder Helle voere.

† Gene. 4.b.12. 9.a.6.

18

^* Wie vroomelijc henen gaet, die sal ghenesen: Maer wie van verkeerden weghe is, die sal eens veruallen.

* Prou. 10.b.9.

19

^† Wie zijnen Acker bouwet, die sal broots ghenoech hebben: Maer wie nae ledich gaen gaet, die sal Armoeden ghenoech hebben.

† Prou. 12.b.11. Eccle. 20.d.30.

20

Een ghetrouwe man wordt veel gheseghent:^† Maer wie haestet rijck te worden, die en sal niet onschuldich blijuen.

† Prou. 20.c.21. 23.a.4. 1.Tim. 6.b.9.

21

^* De persoonen aensien, en is niet goet, Want hy doet quaet, oock wel om een stuck broots.

* Deut. 1.c.17. 17.a.2. Iacob. 2.b.9. Pro. 24.d.23.

22

⁺ Wie tot rijckdom haestet, ende is nijdich, Die en weet niet dat hem ongheual ontmoeten sal.

+ D vers 22

23

Wie eenen mensche straft, die sal daer nae gonste vinden, Meer dan die daer flatteert.

24

^* Wie zijnen Vader oft Moeder yet neemt, ende seyt: Het en sy gheen, sonde, die is des verderuens gheselle.

* Mat. 15.a.5.

25

Een stout man verwect gekijf: Maer wie hem opten HEERE verlaet, die wort vet.

26

^† Wie hem op zijn herte verlaet, die is een Sot: Maer soo wie met wijsheyt voortgaet, die sal ontcomen.

† Iere. 17.b.5.

27

^† Wie den armen gheeft, die en sal gheenen Commer lijden: Maer wie zijne ooghen afkeert, die sal seer afnemen.

† 2.Cor. 9.b.9. Deut. 15.a.8. Prou. 11.c.24.

28

^* Als de Godloose op comen, so verbergen hen de Lieden: Maer als sy vergaen, soo wort der gherechtigher vele.

* Pro. 28.b.12 29.a.2.