Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxiij. Capittel.

1

⁺ ALs ghy sit ende etet met eenen Heere, so merct daer op, wien ghy voor v hebt.

+ A vers 1

2

Ende settet een messe aen uwe kele, wilt ghy dat leuen behouden.

3

En wenschet v niet van zijnder spijsen, want het is valsch broot.

4

^* En vermoeyt v niet om rijc te worden, ende laet af van uwen vonde.

* Eccle. 27.a.4 Iere. 17.b.11. 1.Tim. 6.b.9. Prou. 20.c.21. 28.c.20.

5

En laet uwe ooghen niet derwaert vliegen, dat ghy niet hebben en muecht, want dat selue maeckt hem vlueghelen, ghelijck eenen Arent ende vliecht na den Hemel.

6

En etet geen broot by eenen nijdigen, ende en wenschet v niet van zijnder spijsen.

7

Want ghelijck als een^† Spoeck is hi inwendich. Hy spreect: Eet ende drinckt, ende zijn herte en is doch niet aen dy.

† Ghedrocht.

8

Vwe beten die ghy gheten hadt, moet ghy wt spouwen, ende moet uwe vriendelijcke woorden verloren hebben.

9

^† En spreect niet voor des sotten ooren, want hy veracht de cloeckheyt uwer redenen.

† Eccle. 22.b.7.c.14. Matt. 7.a.6.

10

^* En drijft niet te rugghe de voorledene palen, ende en gaet niet opter weesen acker.

* Pro. 22.d.28 Deut. 19.c.14 27.c.17. Iob. 24.a.2.

11

^‡ Want haer verlosser is machtich, die sal hare saken teghen v wtuoeren.

‡ Pro. 22.c.23.

12

⁺ Gheeft uwe herte tot der castijender onderwijsinghe, ende uwe ooren tot vernuftighe redenen.

+ B vers 12

13

^* En laet niet af den Ionghelinck te castijen: Want ist dat ghy hem metter roeden slaet, so en derfmen hem niet dooden.

* Prou. 13.c.24 Eccle. 30.a.1. Prou. 19.c.18. 29.b.17.

14

Ghy slaet hem metter roeden: Maer

[p. 232v]

ghy verlost zijn siele vander hellen.

15

Mijn sone, ist dat ghy wijs zijt, soo verblijdet mijn herte hem oock.

16

Ende mijne nieren zijn vrolijc, als uwe lippen spreken wat recht is.

17

^* Dijn herte en volghe niet de sondaers: Maer weest dagelijcx inder vreesen des HEEren.

* Prou. 24.a.1.

18

Wandt het sal v hier naemaels goet zijn, ende dijn verwachten en sal niet faelgeren.

19

Hoort mijn sone, ende zijt wijs, ende richtet dijn herte opten wech.

20

^† En zijt niet onder de suypers ende sluymers, want de suypers ende sluymers verarmen: Ende een slaper moet verscuerde cleederen draghen.

† Prou. 21.c.17. Eccle. 19.a.5.

21

Hoort uwen vader die v gewonnen heeft, ende en veracht uwe moeder niet, als si out wort.

22

^* Coopt de waerheyt, ende en vercooptse niet, wijsheydt, onderwijsinghe ende verstant.

* Esaie. 55.a.1.

23

Een vader des gherechten verblijdet hem: Ende wie eenen wijsen sone ghewonnen heeft, die is vrolijck daer ouer.

24

Laet hen uwe vader ende moeder verblijden, ende vrolijck zijn die v ghebaert heeft.

25

⁺ Gheeft my mijn sone dijn herte, ende laet uwen oogen mijne wegen welbehagen.

+ C vers 25

26

^* Want een hoere is eenen diepen cuyle: Ende de Ouerspeelster is eenen engen cuyle.

* Pro. 22.b.14.

27

Oock loert si ghelijck een roouer, ende de dertelen onder de menschen vergadert si tot haer.

28

Waer is wee? Waer is leedt? Waer is twist? Waer is claghen? Waer zijn wonden sonder oorsake? Waer zijn roode ooghen?

29

^† Te wetene, waermen byden wijn sit, ende te samen coemt wt te suypen soo wat ingheschenct is.

† Esaie. 5.b.11.c.22.

30

En siet den wijn niet aen, dat hi root is, ende int ghelas soo schoone staet. Hy gaet fijn glat inne.

31

Maer daer na steect hy gelijc een slanghe: Ende fenijnicht ghelijck een Adere.

32

Soo sullen uwe ooghen nae andere wijuen sien, ende dijn herte sal verkeerde dinghen spreken.

33

Ende sult zijn ghelijck eenen die midden in de zee slaept, ende ghelijc eene die bouen opten mastboom slaept.

34

Sy slaen my, mer het en doet my niet wee: Sy stooten my aen, maer ic en gheuoelt niet.

Wanneer wil ick ontwaken? Dat ict meer ghebruycke.