Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxij. Capittel.

1

⁺ DAt^† gheruchte is costelijcker dan grooten rijckdom: Ende gonst is beter dan siluer ende gout.

+ A vers 1

† Eccle. 42.a.7 Eccle. 7.a.2. Cant. 1.a.3. Act. 16.a.2. 1.Mac. 2.f.51. Prou. 27.b.12

2

Rijcke ende armen moeten door malcanderen henen zijn: De HEEre heeftse altemael ghemaect.

3

De voorsichtighe siet dat ongheluck ende verbercht hem: De ghecken gaen door wech, ende worden beschadighet.

4

Waermen lijdet in des HEEREN vreese, daer is rijckdom, eere ende leuen.

5

Doornen ende stricken zijn opten wech des verkeerden: Maer wie hem daer verre af maect, die bewaert zijn leuen.

6

^* Ghelijck alsmen eenen iongen ghewennet, soo en laet hy daer niet af, als hy oudt wordt.

* Prou. 20.b.11.

7

De rijcke heerschapt ouer de armen: Ende soo wie ontleenet, die is des leenders knecht.

8

Wie^† onrecht saeyt, die sal moeyte maeyen, ende sal door de roede zijnder boosheyt te niet worden.

† Iob. 4.a.8. Galat. 6.a.8.

9

^+† Een goede ooghe wort gheseghent:^* Want hy gheeft van sinen broode den Armen.

+ B vers 9

† Eccle. 23.a.3.

* Tobi. 1.c.17. 4.b.5.c.13,

10

Drijft den bespotter wt, soo gaet dat ghekijf wech, soo houdet den twist ende smaet op.

11

Wie een trouwe herte ende lieffelijcke reden heeft, dies vrient is de Coninck.

12

De oogen des HEEREN bewaren goeden Raet: Maer de woorden des verachters verkeert hy.

13

^* De luye seyt: Daer buyten is een leeuwe, ic mocht verworcht worden opter strate.

* Prou. 26.b.13

14

Der^† hoeren mondt is eenen diepen cuyle, Wien de HEERE onghenadich is, die vallet daer in.

† Prou. 23.c.26

15

^* Dwaesheyt steect den Ionghelinck int herte: Maer de roede der castijdinghe salse verre van hem drijuen.

* Genes. 8.d.21.

16

Wie den armen onrecht doet, dat zijns goets vele soude worden, die sal ooc eenen anderen rijcken gheuen, ende noot lijden.

17

⁺ Neycht uwe ooren, ende hoort de woorden der wijsen, ende neemt mijne leeringhe ter herten.

+ C vers 17

18

Want het sal v saechte doen, ist dat ghyse by v behout, Ende sullen altesamen door uwen mont wel ghelucken.

19

Op dat uwe hope sy opten HEEre: Ick moete v sulcx daghelijcx vermanen v te goede.

20

En heb ickt v niet menichfuldelijck voor gheschreuen, met raden ende leeren?

21

Dat ic v leerde eenen gewissen gront der waerheyt, dat ghy recht geantwoorden condet den ghenen die v seynden.

22

En berooft den armen niet, hoe wel hy arm is:^† Ende en verdruct den ellendighen niet inder poorten.

† Exod. 22.c.21.

23

^* Want de HEERE sal haer sake handelen, ende sal haer ondertreders ondertreden.

* Prou. 23.b.11.

24

^+† En versellet v niet metten toornighen man, ende en hout v niet by eenen verbolghen man.

+ D vers 24

† Eccle. 8.c.19.

25

Ghy mocht anders sinen wech leeren, ende argernisse uwer sielen daer af crijgen.

26

^† En zijt niet by de ghene, die haer hant verknoopen, ende voor schult borghe worden.

† Prou. 6.a.1. 11.b.11. 17.c.18

27

Want ist dat ghijt niet en hebt te betalen, soo salmen v uwe bedde onder v wech nemen.

28

^† En drijft niet te rugge die voorledene palen, die uwe vaders gemaect hebben.

† Deut. 27.c.17 Prou. 23.a.10 Iob. 24.a.2.

29

Siet ghy eenen man rasch in zijnen wercke, die sal voor de Coningen staen, ende en sal niet voor de onedele staen.