Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxj. Capittel.

1

⁺ DEs^† Conincx herte is de hant des HEEren ghelijc waterbeken, ende hy neycht het, werwaerts hy wilt.

+ A vers 1

† 3.Mac. o.151. 4.Regum. 1.c.9 2.Hes. 4.b.5.

2

^* Eenen yeghelijcken duncket zijnen wech recht zijn: Maer alleen de HEEre maket de herten ghewisse.

* Prou. 16.a.2.

3

^† Recht doen ende gherichte, is den HEEre lieuer dan offerhande.

† 1.Reg. 15.e.22. Hozee. 6.b.11 Math. 9.b.13. 12.a.7.

4

^* Hoouaerdighe ooghen ende eenen stouten moet, ende de luchte der godloosen is sonde.

* Pro. 6.b.17

5

De aenslaghen eens^‡ Endighen, brenghen oueruloedicheydt: Maer wie al te haestich is, die heeft ghebreck.

‡ Naerstigen.

6

Wie schatten vergadert met lueghenen, die sal faelgeren, ende vallen onder die, die sinen doot soecken.

7

Der godloosen roouen salse verschricken: want si en wilden niet doen wat recht was.

8

⁺ Wie eenen anderen wech gaet, die is verkeert:^† Mer wie in sinen beuele gaet, dies werck is recht.

+ B vers 8

† Titum. 1.c.15.

9

^* Het is beter woonen inden hoecke onder dat dack, dan by een kijfachtich wijf in eenen huyse te samen.

* Prou. 25.d.23 Eccle. 25.c.23.

10

De siele des godtloosen wenschet dat boose, ende en gonnet den naesten niet.

11

^† Als de bespotter ghestraft wort, soo worden de gecken wijs: Ende alsmen eenen wijsen onderwijst, so wort hy vernuftich.

† Prou. 19.d.25

12

De rechtuaerdige hout hem wijsselijc tegen des godloosen huys: Maer de godloose dencken slechs schade te doen.

13

^* Wie sine ooren toestopt voor dat crijsschen des armen, die sal oock roepen ende niet verhoort worden.

* Esai. 47.a.6. Mat. 18.d.29. Luc. 16.c.19.d.24.

14

Een heymelijcke gaue stillet de gramschap: Ende een gheschenck inden schoot de heftighe verbolghentheyt.

15

⁺ Het is den gherechtigen een blijscap, te doen wat recht is: Mer een vreese den quaetdoenders.

+ C vers 15

16

Een mensch die vanden wech der cloecheyt doolt, die sal blijuen inder dooden ghemeynte.

17

^* Wie gheerne in wellust leeft, die sal ghebreck lijden:^† Ende wie wijn ende olie lief heeft, die en wort niet rijck.

* Luc. 16.c.19.

† Eccle. 19.a.5.

18

^* De godloose moet voor den rechtuaerdighen ghegheuen worden: Ende die verachters voor de oprechten.

* Prou. 11.b.8.

19

^† Tis beter in eenen woesten Lande woonen, dan by eenen kijfachtighen ende toornighen wijue.

† Prou. 25.c.24. Eccle. 25.c.23.

20

Inden huyse des wijsen is eenen lieffelijcken schat ende olie: Maer een sot verslampamtet.

21

Wie der barmherticheyt ende goedertierenheydt nae iaghet, die vindet dat leuen, barmherticheyt ende eere.

22

⁺ Een wijs man wint de stadt der stercken, ende worpt haer macht door haer sekerheyt ter neder.

+ D vers 22

23

^† Wie sinen mont ende tonge bewaert, die bewaert zijn siele van angst.

† Prou. 12.b.13. 13.a.3.

24

Die stout ende vermeten is, heet een

[p. 232r]

^† loos mensche, die in toornicheyt stoutheyt bewijst.

† Rabbaut.

25

De luye steruet ouer zijn wenschen: Want sine handen en wilden niet doen.

26

Hy wenschet wel daghelijcx: Maer de rechtuaerdighe gheeft ende en verseyt niet.

27

^† Der godtloosen offerhande is eenen grouwel: Want si worden in sonden geoffert.

† Iere. 7.c.20. Esaie. 1.b.13. Eccle. 35.a.1. Prou. 15.a.8.

28

^* Een lueghenachtighe ghetuyghe sal vergaen: Maer wie ghehoor gheeft, dien laetmen oock altijt wederom spreken.

* Pro. 19.a.5. Deut. 19.d.19 Susan. 1.g.62

29

De godtloose vaerter metten hoofde door: Maer wie oprechtich is dies wech sal bestaen.

30

^* Daer en helpt gheen wijsheyt, geen verstant, geenen raet, tegen den HEEre.

* Esaie. 8.a.2. 46.b.8.

31

De^† Rossen worden wel totten strijtdaghe bereydt: Maer de ouerwinninghe coemt vanden HEEre.

† Psal. 33.d.17