Den Bibel, Inhoudende dat Oude ende Nieuwe Testament (Biestkensbijbel)

¶ Dat .xviij. Capittel.

1

⁺ VVie hem af sondert, die soect wat hem ghelustet, ende settet hem teghen al wat goet is.

+ A vers 1

2

Een Sot en heeft gheenen lust aen verstant: Maer tot dien, wat in zijn herte steket.

3

Waer de godloose coemt, daer coemt oock verachtinge, ende smaet met schimpe.

4

De woorden in eens mont zijn ghelijc diepe wateren: Ende de fonteyne der wijsheyt is eenen vollen stroome.

5

^* Het en is niet goet den persoon des godtloosen te achten, den gherechten int Gherichte te buyghen.

* Prou. 24.c.23 Deut. 1.c.17. Iacobi. 2.b.9.

6

De lippen des sotten brengen in twist, ende sinen mont haket nae slaghen.

7

De mont des Sotten schadet hem seluen, ende zijne lippen vanghen zijn eygen siele.

8

^+* De woorden des Achterclappers zijn slaghen, ende gaen eenen door dat herte.

+ B vers 8

* Leuit. 19.d.16 Prou. 26.c.22

9

Wie traech is in sinen arbeyt, die is een broeder dies, die dat sine verdoet.

10

^† Den Naem des HEEREN is een vaste Borcht: De gherechtighe loopt

† Psalm. 32.a.6 Esaie. 26.a.1.

[p. 231r]

derwaerts, ende wordt beschermt.

11

^* Dat goet des rijcken is hem een vaste stadt, ende ghelijck een hooge muere rontsom hem.

* Prou. 10.b.15

12

Wanneer een te gronde gaen sal, soo wort zijn herte te voren stout:^† Ende eermen ter eeren coemt, moetmen te voren lijden.

† Prou. 15.d.33. Luc. 24.d.26.

13

^* Wie antwoort eer hi hooret, dien ist sotheyt ende schande.

* Eccle. 10.e.43

14

Wie een vrolijck herte heeft, die weet hem in zijn lijden te houden: Maer als den moet neder leyt, wie can dat verdragen?

15

Een verstandich herte weet hem vernuftelijc te houden, ende de wijse hooren gheerne, datmen vernuftichlijck handelt.

16

^* Dat geschencke des menschen, maect hem ruymte, ende brengt hem voor de groote Heeren.

* Prou. 17.b.8.

17

⁺ De Rechtuaerdighe is zijnder sake te voren ghewisse: Coemt zijn naeste, soo vindet hy hem alsoo.

+ C vers 17

18

Dat Lot stillet den twist, ende scheydet tusschen de machtighe.

19

Een broeder die vertoornet is, houdt herder dan een vaste stadt: Ende twist hout herder dan eenen grendel aender Borcht.

20

Eenen man wort vergouden daer na als sinen mondt ghesproken heeft, ende wordt versadet vander vrucht zijnder lippen.

21

^* De doot ende dat leuen staen int gewelt der tonghen: Wiese bemint, die sal van haerder vrucht eten.

* Math. 12.c.37

22

^* Wie een echte wijf vindet, die vint wat goets, ende can wel goeder dinghe zijn inden HEEre.

* Pro. 19.b.14. 31.b.10. Eccle. 26.a.1.

23

Een arm man spreect met bidden: Een rijck man antwoort stoutelijck.

24

Een ghetrouwe vrient heeft eenen lieuer, ende staet vaster by eenen, dan een broeder.