Den Bibel, Inhoudende dat Oude ende Nieuwe Testament (Biestkensbijbel)

¶ Dat .xvij. Capittel.

1

⁺ EEnen^† drooghen beet daer aen men hem ghenoeghen laet, is beter, dan een huys vol gheslaghen vees met twiste.

+ A vers 1

† Pro. 15.b.16 16.b.8. Eccle. 4.a.6. Eccle. 29.d.30

2

^‡ Een cloeck knecht sal heerschappen ouer onneerstighe Erfghenamen, ende sal onder de broeders dat Erue wt deelen.

‡ Eccle. 10.a.3.

3

Ghelijck als dat vier tsiluer, ende den ouen tgout,^† alsoo proeft de HEEre de herten.

† Psal. 7.b.10. 17.a.3. 66.b.10. Sapi. 3.a.5. Eccle. 2.a.5.

4

Een boosch mensch achtet op boose monden: Ende een valsch mensche hoort geerne de schadelijcke tonghen.

5

^* Wie den armen bespottet, die beschimpt des seluen schepper:^‡ Ende wie hem van zijn ongheual verblijdet, die en sal niet onghestraft blijuen.

* Pro. 14.d.31

‡ Iob. 31.c.29. Psal. 35.b.15. Pro. 24.c.17.

6

Der ouden Croone, zijn kints kinderen: Ende der kinderen eere, zijn hare vaders.

7

Het staet eenen Sot niet wel aen, van hooghen dinghen te spreken: Veel weynigher eenen Vorst, dat hy liecht.

8

^+* Dat gescencke is eenen edelen steen, dien, diet heeft: Werwaerts hy hem keert, is hy cloeck gheachtet.

+ B vers 8

* Prou. 18.b.16

9

Wie de sonde bedect, die maect vrientschap: Maer wie de sake ander ende andermael meldet, die maeckt de Vorsten oneens.

10

Schelden verschricket meer aen den verstandighen, dan hondert slaghen aen den Sotten.

11

Een bitter mensch poocht om schade te doen: Maer eenen grouwelijcken Enghel sal ouer hem comen.

12

Het is beter een beyre gemoeten, dien sine iongen gerooft zijn, dan eenen Sotte in zijnder sotheyt.

13

^† Wie goet met quaden betaelt: Van dies huyse en salt quaet niet aflaten.

† 1.Re. 24.c.11 26.b.8. 2.Reg. 12.c.10. Iere. 18.c.20.

14

Wie twist beghint, is ghelijck als die den water den dam opschuert: Laet ghy af vanden twist, eer ghy daer in ghemenghet wort.

15

^+* Wie den godloosen gherecht seyt te wesen, ende den gherechten verdoemt, die zijn alle beyde den HEERE eenen grouwel.

+ C vers 15

* Esaie. 5.c.23. Pro. 24.c.24

16

^* Wat sal den Sotte gelt in de hant, om wijsheyt te coopen, daer hy doch een sot is?

* Acto. 8.c.18.

17

Een vrient heeft altijt lief: Ende een broeder wort inder noot bekent.

18

^† Het is eenen sot, die in de hant ghelooft, ende borge wort voor sinen naesten.

† Prou. 6.a.1. 11.b.15.

19

Wie twist lief heeft, die heeft sonde lief: Ende so wie sine duere hooch maect, die staet nae ongheluck.

20

Een verkeert herte en vindet niet goets: Ende die van verkeerder tongen is, sal in ongheluck vallen.

21

⁺ Wie eenen Sot gebaert, die heeft bedructheydt: Ende eens Sotten vader en heeft gheen blijschap.

+ D vers 21

22

^* Een vrolijck herte maect dat leuen lustich: Mer eenen bedroefden moet verdorret de ghebeenten.

* Prou. 12.d.25. 15.b.13. Eccle. 30.c.22.

23

^† De godloose neemt heymelijc geerne geschencken, om den wech des Rechts te buyghen.

† Exod. 23.a.8 Deut. 17.a.2. 27.c.26. Eccle. 20.d.31. Ezech. 22.b.12

24

Een verstandighe ghelaet wijsselijck: Maer een Sot werpet de ooghen ghins ende weder.

25

Een sotachtich sone is zijns vaders trueren, ende bedroeffenisse zijnder moeder die hem ghebaert heeft.

26

Het en is niet goet, datmen den rechtuaerdighen scheyndet, ende den Vorste slaet, die daer recht regeert.

27

^* Een voornuftich man, die matighet sine redene: Ende een verstandich man, is een dierbare Siele.

* Iacobi. 1.c.19.

28

^† Waert dat een Sot sweech, so werde hy oock wijs ghehouden: Ende verstandich, waert dat hy den mont toe hielde.

† Iob. 13.a.5.