Den Bibel, Inhoudende dat Oude ende Nieuwe Testament (Biestkensbijbel)

¶ Dat .xv. Capittel.

1

⁺ EEn^† vriendelijck antwoort stillet de gramschap:^* Maer een hardt woort, verwect verbolghentheyt.

+ A vers 1

† Prou. 25.c.15. Iudic. 8.a.2.

* Pro. 15.c.18. 3.Re. 12.b.14.

2

De tonghe der wijsen maect de leeringhe lieffelijck: Der Sotten mondt spouwet enckel sotheyt.

3

^† De ooghen des HEEREN sien aen allen plaetsen, beyde de boose ende de vroome.

† 2.Par. 16.b.9 Psal. 33.b.13. Iob. 28.c.25. Eccle. 23.d.27 2.Mac. 9.a.5. 12.d.22. Hebre. 4.c.13 1.Pet. 3.b.12.

4

Een heelsame tonghe is eenen boom des leuens: Maer een lueghenachtighe tonghe richtet hertsrouwe aen.

5

De Sot lastert de castijende onderwijsinghe zijns Vaders:^* Maer wie de straffinghe aenneemt, die sal voorsichtich worden.

* Pro. 15.d.32.

6

^† Des gherechtigen huys heeft groot goet: Mer inden incomen des godloosen, is verderuen.

† Tob. 4.c.18.

7

De mondt der wijsen stroyt wt goeden raet: Maer der Sotten herte en is alsoo niet.

8

^* Des Godloosen Offerhande is den HEERE een afgrijselijckheyt:^† Maer dat ghebet der oprechter is hem aenghenaem.

* Prou. 21.d.27 Esaie. 1.c.13. Eccle. 35.a.1.

† 1.Pet. 3.b.12

[p. 230r]

9

⁺ Des Godloosen wech is den HEERE een afgrijselijcheyt: Mer so wie der gerechticheyt na iaghet, die wort bemint.

+ B vers 9

10

Dat is een quade onderwijsinge, den wech verlaten:^† Ende so wie de straffinghe hatet, die moet steruen.

† Prou. 5.c.23. 29.a.1.

11

De Helle ende de verderffenisse is voor den HEEre,^* Hoe veel meer der menschen herte?

* Iere. 17.b.10. Apoca. 2.e.23.

12

^† De bespotter en bemint den ghenen niet, die hem straft: Ende en gaet niet tot den Wijsen.

† Sapi. 2.c.12.

13

^* Een vrolijck herte maect een vrolijc aenghesicht: Maer als dat herte becommert is, soo valt oock de moet.

* Prou. 12.d.25. 17.d.22. Eccle. 30.c.22.

14

Een verstandich herte handelt bedachtelijck: Maer de coene Ghecken, regeren gheckelijck.

15

Een bedroefde en heeft nemmermeer gheenen goeden dach: Maer eenen goeden moet is een daghelijcx welleuen.

16

^* Het is beter een weynich metter vreesen des HEEren, Dan eenen grooten schat daer onrust by is.

* Prou. 16.b.8. 17.a.1. Psal. 37.b.16. 1.Tim. 6.b.8. Eccle. 29.d.30 Eccle. 4.a.6.

17

⁺ Het is beter een moes gherecht met liefden, dan eenen ghemesten Ossche met hate.

+ C vers 17

18

^† Een toornich man berockt twist:^‡ Maer een verduldich man stillet den twist.

† Prou. 15.a.1

‡ Iudic. 8.a.2.

19

Den wech des traghen is doornachtich: Maer den wech des vroomen is wel ghebaent.

20

^* Een wijse sone verblijt den vader: Ende een sotachtich mensche is zijnder moeder schande.

* Prou. 10.a.1.

21

Den Sotten is de sotheydt een blijschap: Maer een verstandich man blijft opten rechten wech.

22

De aenslaghen worden te niete, waer gheenen raet by en is:^† Maer waer veel raetgheuers zijn, daer bestaen si.

† Prou. 11.b.14 24.a.6.

23

Het is eenen een blijschap, ist datmen hem recht antwoort:^† Ende een woort tot zijnder tijt is seer lieflijck.

† Prou. 25.b.11

24

Den wech des leuens gaet opwaerts cloeck te maken, Op datmen mijde de Helle onderwaerts.

25

De HEERE sal dat huys des hoouaerdighen te stucken breken:^† Ende de Palen der Weduwen beuestighen.

† Psal. 146.b.9

26

⁺ De aenslaghen des arghen zijn den HEEre een afgrijselijcheyt: Maer troostelijcke reden den reynen.

+ D vers 26

27

De ghierighe verstoort zijn eyghen huys:^† Maer soo wie gheschencke hatet, die sal leuen.

† Psal. 15.a.5.

28

Dat herte des gherechten dichtet wat te antwoorden is: Maer den Mont der Godlooser schuymet quaet wt.

29

De HEEre is verre vanden Godtloosen:^† Maer der gherechter gebet, verhoort hy.

† Tob. 3.d.18. Susan. f.44. Acto. 10.a.4. Ioan. 9.e.31.

30

Vriendelijck sien, verblijdt dat herte: Een goet gheruchte maket dat ghebeente vet.

31

Dat oore, dat daer hooret de straffinge des leuens, sal onder de wijse woonen.

32

^* Wie hem niet en laet castijen, die maect hem seluen te niete:^† Maer so wie de straffinghe hooret, die wort cloeck.

* Prou. 5.c.23.

† Prou. 12.a.1 15.a.5.

33

^* De vreese des HEEren, is de onderwijsinge totter wijsheyt:^† Ende eermen ter eeren coemt, moetmen te voren lijden.

* Eccle. 1.c.16.

† Lu. 24.d.26 Acto. 14.c.21. Prou. 18.b.12.