Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiiij. Capittel.

1

⁺ DOor^† wijse Wijuen wort dat huys ghetimmert: Maer een Sottinne breket in stucken met haren doene.

+ A vers 1

† Prou. 24.a.3.

2

Wie den HEEre vreest, die gaet op de rechte bane: Maer wie hem verachtet, die wijct wt sinen weghe.

3

^* Sotten spreken Tyrannichlijc: Mer de wijse bewaren haren mont.

* 2.Regum. 11.a.2 3.Reg. 19.a.2. 4.Re. 6.g.31. 2.mach. 9.a.4

4

Waer gheen Osschen en zijn, daer is de Cribbe reyn: Maer waer den Ossche werckende is, daer is veel incomens.

5

Een ghetrouwe ghetuyghe en liecht niet:^† Maer een valsche ghetuyge spreect coenlijck lueghenen.

† Susan. e.34.

6

De bespotter soeckt wijsheyt ende en vintse niet: Maer den verstandighen is de kennisse licht.

7

^* Gaet vanden Sotte, want ghy en leert niet van hem.

* 2.Cor. 6.b.14

8

Dat is des voorsichtighen wijsheyt, dat hy op sinen wech merct: Maer dat is der sotten dwaesheyt, dat het enckel bedroch met hen is.

9

De Sotten bedrijuen haer spotterije metter sonde: Mer de vroome hebben haren lust aen de oprechtighe.

10

⁺ Wanneer dat herte truerich is, so en helpt gheen wtwendighe vruechde.

+ B vers 10

11

Dat huys der Godloosen wordt vernielt: Maer de Hutte der oprechtighen sal groeyen.

12

^* Menighen behaghet eenen wech wel: Maer eyndelijck brengt hy hem totten doot.

* Prou. 16.c.25.

13

^† Nae dat lachen coemt trueren: Ende nae de vruechde coemt rouwe.

† Eccle. 3.a.5.

14

Eenen loosen Mensche salt gaen ghelijck hy handelt: Maer een vroom Man sal ouer hem zijn.

15

^† Een onwetende gheloouet alle dinc: Maer een voorsichtighe, merct op sinen ganck.

† Eccle. 19.a.8. Mat. 24.b.23

16

Een wijs man vreest hem, ende schouwet dat erch: Maer een Sot vaerter stoutelijck door.

17

Een onuerduldich man doet sottelijc: Maer een voordachtich man hatet.

18

⁺ De Ghecken beeruen sotheydt: Maer het is der voorsichtighen Croone, voorsichtelijck handelen.

+ C vers 18

19

De quade moeten hen buyghen voor de goede: Ende de Godloose inde poorten des Rechtuaerdighen.

20

^* Eenen Armen, haten ooc sine naesten: Maer de Rijcken hebben veel Vrienden.

* Prou. 19.a.4

21

De Sondaer veracht sinen naesten:^† Maer wel dien, die der ellendigher ontfermt.

† Psal. 41.a.1.

22

Die met boose rancken omgaen, sullen faelgeren: Maer die wat goets dencken, die sal trouwe ende goedertierenheyt ghebueren.

23

Waermen arbeyt, daer is ghenoech: Maer waermen met woorden omgaet daer is Commer.

24

Den wijsen is haer Rijcdom een croone: Mer de dwaesheyt der Sotten, blijft slechs sotheyt.

25

Een ghetrouwe ghetuyghe verlost dat leuen: Maer een valsche ghetuyghe bedriecht.

26

^† Wie den HEEre vreest, die heeft een seker vasticheyt: Ende sine kinderen worden oock beschermt.

† Eccle. 1.b.13.

27

^+† De vreese des HEEren, is een fonteyne des leuens, datmen mijde de stricken des doots.

+ D vers 27

† Prou. 13.b.14

28

Waer^† een Coninck veel volcx heeft, dat is sine heerlijcheyt: Maer ist dat des volcx niet veel en is, dat maect den Heere bloode.

† 3.Reg. 4.b.20

29

Wie verduldich is, die is wijs: Maer wie onuerduldich is, die openbaert sine sotheyt.

30

^† Een goedertieren herte is des lichaems leuen: Maer nijdicheyt is Etter inde ghebeenten.

† Eccle. 30.c.23.

31

^* Wie den cleynen ghewelt doet, die lastert des seluen schepper: Maer so wie hem des Armen ontfermt, die eeret God.

* Sacha. 2.b.8. Prou. 17.a.5. Mat. 25.d.40

32

Die^† Godtloose en blijft niet staende in sinen ongheluck: Maer de gherechtige is oock in sinen doot vrijmoedich.

† Leui. 26.f.36 Prou. 28.a.1.

33

Int herte des verstandighen rustet wijsheyt, ende wordt openbaer onder de Sotten.

34

^† De gherechticheyt verhooghet een volck: Maer de sonde is der Lieden verderuen.

† Prou. 11.b.14

35

Een cloeck knecht behaghet den Coninck wel: Maer eenen schandelijcken knecht is hy Viant.