Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiij. Capittel.

1

⁺ EEn wijse soon laet hem den Vader^* tuchtighen: Maer een bespotter en hoort de straffinghe niet.

+ A vers 1

* Castijende onderwijsen.

2

De vrucht des mondts ghenietmen: Maer de verachters dencken slechs te vermeten.

3

Wie sinen mont bewaert, die bewaert zijn leuen:^† Maer wie met sinen Mondt wtuaert, die coemt in verschricken.

† Prou. 12.b.13. 21.d.23.

4

^* De luye begheert, ende en crijghes doch niet: Maer de neerstighe crijghen ghenoech.

* Prou. 6.a.6

5

De gherechtighe is der luegenen Viant: Maer de Godtloose scheyndet ende lastert hem seluen.

6

De gherechticheydt bewaert den onschuldighen: Maer dat Godloos wesen, brengt eenen totter sonde.

7

Menich is arm by grooten goede: Ende menich is rijcke by zijn armoede.

8

^* Metten rijckdom can een zijn leuen verlossen: Maer een Arm man en hoort dat schelden niet.

* Iob. 2.a.2.

9

Dat licht der gherechtiger maect vrolijck: Maer^† de keersse der Godloosen sal wtgaen.

† Pro. 24.c.20. Iob. 18.a.5. 21 b.17. 38.b.15.

10

⁺ Onder den stouten is altoos twist: Maer de wijsheydt maeckt vernuftighe Lieden.

+ B vers 10

11

Rijcdom wort weynich, wanneermen hem vergiet: Maer watmen tsamen hout, dat wort groot.

12

De hope die hem vertrect, die benaut dat herte: Maer alst coemt datmen begheert, dat is eenen boom des leuens.

13

^† Wie dat woort veracht, die verderft hem seluen: Maer wie dat gebot vreest, dien wortet vergouden.

† mat. 24.d.48

14

^* De Leeringhe des Wijsen, is een Leuende Fonteyne, om de stricken des doots te mijden.

* Pro. 14.d.27.

15

Eenen goeden raet, doet saechte: Mer der Verachters wech brengt wee.

16

Een voorsichtich Man, doet alle dinc met vernuft: Maer een sotte breydet de sotheyt wt.

17

Een Godtloose Bode, brengt ongheluck: Maer een ghetrouwe Legaet, is heelsaem.

18

^+† Wie de tucht laet varen, die heeft armoede ende schande: Wie hem gheerne laet straffen, die sal ter eeren comen.

+ C vers 18

† Luce. 13.a.7.

19

Alst coemt datmen begheert, dat doet het herte saecht:^† Maer die dat quaet mijdet, die is den dwasen een afgriselicheyt.

† Sapi. 2.c.15. Prou. 29.c.27

20

Wie metten wijsen omgaet, die wort wijs: Maer soo wie der Sotten gheselle is, die sal ongheluck hebben.

21

^* Ongheluc veruolcht de Sondaers: Maer den gherechtighen wort dat goet vergouden.

* Mat. 25.c.31.

[p. 229v]

22

De goede sal eruen op kints kinde: Maer des Sondaers goet wort den gherechtighen voor ghespaert.

23

Daer is veel spijsen inde voren der Armen: Maer die onrecht doen, verderuen.

24

^* Wie sine Roede spaert, die hatet sinen sone: Maer wie hem lief heeft, die castijt hem terstont.

* Eccle. 30.a.1. Prou. 19.c.18. 23.b.13. 29.b.17 Hebre. 12.a.9

25

^† De Rechtuaerdige etet dat sine siele sadt wordt: Maer der Godtloosen buyck en heeft nemmermeer ghenoech.

† Psa. 34.b.11