Den Bibel, Inhoudende dat Oude ende Nieuwe Testament (Biestkensbijbel)

Dit zijn de Spruecken Salomonis. ¶ Dat .x. Capittel.

¶ Van dit Capittel aen totten eenendertichsten toe, worden beschreuen ontallijcke veel schoone, lieflijcke ende wijse Spruecken. Inden welcken de wijsheyt met grooten profijte gheleert, Ende de dwaesheyt met hare schaden te schouwen bewesen wort.

1

⁺ EEn^† wijs Sone is zijns Vaders vruechde: Maer een sotachtighe sone is zijnder Moeder een truericheyt.

+ A vers 1

† Prou. 15.c.20.

2

^* Onrecht goet en helpt niet: Maer gherechticheyt, verlost vanden doot.

* Prou. 11.a.4. Eccles. 5.b.10.

3

^† De HEEre en laet de siele des gherechten gheenen hongher lijden, Maer hy verstoot der godlooser scheynderije.

† Psal. 37.d.25 3.Reg. 17.a.4

4

^* Een trage hant, maect arm, Maer der neerstigher hant maect rijck.

* Prou. 6.a.6.

5

Wie inden Somer vergadert, die is cloeck: Maer wie inden oogst slaept, die wort te schanden.

6

De segheninghe heeft dat hooft des Rechtuaerdighen: Maer den mont der Godloosen, sal haer vermetenheyt oueruallen.

7

^* De ghedachtenisse der Rechtuaerdighen blijft inde segheninghe: Maer den naem der Godlooser sal vergaen.

* Psal. 112.a.5.

8

⁺ Die wijs van herten is, die neemt de gheboden aen: Maer die eenen sotten mont heeft, die wort gheslagen.

+ B vers 8

9

^† Wie onschuldich leeft, die leeft seker: Maer wie verkeert is op zijne weghen, die sal openbaer worden.

† Psal. 23.a.4. Prou. 28.c.18.

10

^* Wie metten oogen wencket, die sal moeyte aenrichten: Ende die eenen sotten mont heeft, die wort gheslaghen.

* Eccl. 27.d.25. Prou. 6.b.13. 16.d.30.

11

Den mont des gherechten is een leuende fonteyne: Maer den mont der Godtloosen sal haer vermetenheyt oueruallen.

12

Haet verwect twist:^† Maer de liefde bedect alle ouertredinghe.

† 1.Petr. 4.b.8. Prou. 11.b.12. 1.Cor. 13.a.4.

13

Inden lippen des verstandigen vintmen wijsheyt:^* Maer opten rugghe des Sotten, behoort een roede.

* Pro. 19.d.29.

14

De wijse bewaren de leeringhe: Maer der Sotten mont is na by der verschrickinghe.

15

^* Dat goet des rijcken is zijne vaste stadt: Mer de armoede maect den armen bloode.

* Prou. 18.b.11.

16

De Rechtuaerdighe ghebruyct zijns goets totten leuen: Maer de Godloose gebruyct zijns incomens totter sonde.

17

De bewaringe der onderwijsinge, is den wech totten leuen: Maer wie de straffinghe verlaet, die blijft dolende.

18

⁺ Valsche monden bedecken haren haet: Ende wie achterclapt, die is een Sot.

+ C vers 18

19

Waer veel woorden zijn, daer en gaet het sonder sonde niet toe: Maer wie zijne lippen hout, die is cloeck.

20

De tonghe des gherechten is costelijc siluer: Maer dat herte der Godtlooser is niet.

[p. 228v]

21

De lippen des gherechtighen weyden veel:^† Maer de Sotten sullen aen haerder dwaesheyt steruen.

† Prou. 5.c.23.

22

De^† segheninghe des HEEren maect rijcke sonder moeyte.

† Iob. 42.c.12. Eccles. 11.b.6.

23

En Sot bedrijft moetwillicheyt, ende heuet noch daer toe zijnen spot daer wt: Maer de man is wijs, die daer op merct.

24

^* Wat de Godloose vreest, dat sal hem ontmoeten. Ende den gherechtigen wort ghegheuen, so wat sy begheren.

* Esai. 66.a.4.

25

De Godloose is^† gelijck een tempeest die gheringhe ouer gaet, ende niet meer en is: Maer de Rechtuaerdighe bestaet eewelijck.

† Psalm. 1.b.5.

26

Also azijn den tanden, ende den roock den oogen doet: So doet de luye den ghenen, die hem seynden.

27

⁺ De^† vreese des HEEren vermeeret de daghen: Maer de Iaren der Godloosen worden vercort.

+ D vers 27

† Prou. 4.b.10. 9.b.11.

28

Dat verwachten der gherechtigher sal blijschap worden:^‡ Maer de hope der godloosen sal verloren zijn.

‡ Prou. 11.a.7. Sap. 5.c.51. Iob. 8.b.13. 11.b.20.

29

Den wech des HEEren is des vromen vermeten: Maer de quaetdoenders zijn bloode.

30

De^* gherechtighe en wort nemmermeer omghestooten: Maer de Godloose en sullen inden lande niet blijuen.

* Psal. 125.a.1.

31

Den mont des gherechtighen brengt wijsheyt: Maer den mont des verkeerden wort wtgheroyt.

32

De lippen des Rechtuaerdighen, leeren heylsame dinghen: Maer der Godloosen mondt is verkeert.