Den Bibel, Inhoudende dat Oude ende Nieuwe Testament (Biestkensbijbel)

¶ Dat .ix. Capittel.

¶ De wijsheyt noot te gaste alle onuerstandighe Sotten, sy beloeft haer groote dinghen, wederom soo wort de dwaesheyt inde ghedaente van eender Clappeye beschreuen, welcke tot haerwaerts loct den Sotten die sy verleyt.

1

⁺ DE wijsheyt timmerde haer huys ende hieuwe seuen Columnen,

+ A vers 1

2

Sloech haer Vee, ende droech haren wijn op, ende bereyde haer tafele.

3

^† Ende seynde haer deernen wt, om te nooden bouen op dat Palleys der stadt.

† Mat. 22.a.3. Luc. 14.c.17.

4

Wie dwaes is, die make hem herwaerts. Ende totten Sot sprack sy:

5

Coemt teeret van mijnen broode, ende drincket vanden wijn, dien ick schencke.

6

Verlaet dat dwase wesen, soo sult ghy leuen, ende gaet op den wech des verstandes.

7

Wie den bespotter onderwijst, die moet schande op hem seluen nemen: Ende wie den Godloosen straft, die moet beschimt worden.

8

En straft den bespotter niet, Hy hatet v.^* Straft den wijsen, die sal v lief hebben.

* Psal. 141.a.5.

9

⁺ Gheeft den wijsen, soo sal hy noch wijser worden. Leert den rechtuaerdighen, so sal hy inder leeringhe toenemen.

+ B vers 9

10

^* Der wijsheyt aenbeghin, is des HEEren vreese, Ende de verstandenisse leert wat heylichs.

* Psal. 111.b.10. Eccle. 1.c.16.

11

Want^† door my sal uwer daghen veel worden, Ende der Iaren dijns leuens sullen meer worden.

† Pro. 4.b.10. 10.d.27.

12

Sijt ghy wijs, so zijt ghy v wijs: Sijt ghy een bespotter, soo sult ghijt alleen draghen.

13

^* Maer daer is een dwaesachtich, onrustich Wijf, vol clapperyen, ende en weet niet.

* Prou. 7.b.10.

14

Die sit inde duere haers huys opten stoel, bouen inder stadt,

15

Om te nooden alle die voorby gaen, ende die oprecht op haren wech wandelen.

16

Wie is gheck? Die make hem herwaerts. Ende totten Sotten spreect sy:

17

De ghestolen wateren zijn soete, Ende dat verborgen broot is genoechlijck.

18

Maer hy en weet niet, dat aldaer dooden zijn, ende hare gasten inder dieper Hellen.$