Den Bibel, Inhoudende dat Oude ende Nieuwe Testament (Biestkensbijbel)

¶ Dat .viij. Capittel.

¶ De wijsheyt roept ende loct alle onuerstandighe tot haer, ende sy vertelt dien haer goeden ende hare macht. Oock wort de wijsheyt hier gepresen ende gelooft, wt welcken alleman verwect ende vermaent wort, haer aen te hangen.

1

⁺ EN^† roept de wijsheyt niet, ende en laet de verstandenisse haer niet hooren?

+ A vers 1

† Prou. 1.b.20.

2

Opentlijc aenden wege, ende aen de straten staet sy,

3

Aende duere der stadt, daermen ter poorten ingaet, crijschet sy:

4

O ghy mannen, ick crijsche tot v, ende roepe totten kinderen der menschen:

5

Merct ghy Gecken de wijsheyt, ende ghy dwasen nemet ter herten.

6

Hooret, want ick wil spreken wat Vorstelijc is, ende leeren wat recht is.

7

^* Want mijnen mont sal de waerheyt spreken, ende mijne lippen sullen haten dat godloos is.

* Iob. 33.a.3.

8

Alle redene mijns monts zijn recht, daer en is niet verkeerts noch valsch in.

9

Sy zijn altemael recht, dien, diese verstaen, ende oprecht, dien, diet aennemen willen.

10

^+* Neemt aen mijne onderwijsinghe, lieuer dan siluer, ende de leeringhe achtet hoogher dan costelijck gout.

+ B vers 10

* Prou. 16.c.16.

11

Want^† wijsheyt is beter dan peerlen, ende alle datmen wenschen mach en can haer niet gelijcken.

† Psal. 19.b.11 Prou. 3.b.15. Iob. 28.b.19. Sap. 7.b.9.

12

Ick de wijsheyt woone byden verstande, ende ick weet goeden raet te gheuen.

13

De vreese des HEEren hatet dat quade, de hoouaerdicheyt, den hoochmoet, ende den boosen wech, ende ben Viant den verkeerden monde.

14

Ic can raden ende wtuoeren, Ick hebbe verstant ende macht.

15

^† Door mi regeren de Coningen, ende de Raetsheeren setten dat recht.

† Deut. 17.d.23. Sap. 6.a.2.

16

Door my heerschappen de Vorsten, ende alle Regenten op Aerden.

17

Ic heb lief die my lief hebben,^‡ Ende die my vroech soecken, die vinden my.

‡ Luc. 11.b.9. Math. 7.a.7.

18

Rijckdom ende eere is by my duerachtich goet ende gerechticheyt.

19

Mijne vrucht is beter dan gout ende fijn gout, Ende mijn incomen beter dan wtghelesen siluer.

20

Ic wandele op den rechten weghe, Opter straten des rechtes.

21

Dat ick wel berade die my liefhebben, ende hare schatten vol make.

22

^+* De HEEre heeft my gehadt int beghinsel zijnder wegen, Eer hy wat maecte was ick daer.

+ C vers 22

* Sap. 9.b.9.

23

^† Ick ben ingeset van eewicheyt, van aen tbeghintsel voor de Aerde,

† Eccl. 24.b.13 Colloss. 1.b.16

24

Doen de diepten noch niet en waren, doen was ick alrede veerdich.

Doen de fonteynen noch niet met water en sprongen.

25

Eer dan de Berghen inghesenct waren, voor de cleyne Bergen, was ic veerdich.

26

Hy en hadde de Aerde noch niet ghemaect, ende wat daer in is, noch de Berghen des Aertbodems.

27

^† Doen hy de Hemelen bereyde, doen was ick aldaer. Doen hy de diepten met zijnen perck beuinc.

† Sap. 9.b.9.

28

Doen hy de Wolcken daer bouen aen beuestede, Doen hy vestichde de Fonteynen der diepten.

29

Doen^† hy de See dat perck stelde, ende de wateren dat sy niet en souden ouer gaen zijnen beuele. Doen hy dat Fondament der Aerden leyde,

† Gene. 1.a.9. Iob. 26.b.10. 28.c.26. Iere. 5.d.21.

30

⁺ Doen was ic de werckmeester by hem, Ende hadde mijnen lust daghelijcx, ende speelde voor hem alle tijt,

+ D vers 30

31

Ende speelde op zijnen Aertbodem. Ende mijnen lust is byden kinderen der menschen.

32

Soo^* ghehooret my nv mijne kinderen: Wel den ghenen die mijne weghen bewaren. Hooret de onderwijsinge, ende wort wijs, ende en laetse niet varen.

* Prou. 1.a.8. 4.a.1.

33

Wel

[p. 228r]

den mensche die my ghehoor gheeft,^† dat hy wake aen mijnder dueren daghelijcx, dat hi de wacht houde aen de posten mijnder dueren.

† mat. 24.d.46 Apoc. 16.c.15.

34

Wie my vindet, die vindet dat leuen, ende sal een welbehaghen becomen vanden HEEre.

35

Maer wie aen my sondicht, die quetst zijne siele. Alle die my haten, hebben lief den doot.