Den Bibel, Inhoudende dat Oude ende Nieuwe Testament (Biestkensbijbel)

¶ Dat .vij. Capittel.

¶ Vermaent ons tot wijsheyt, Ende vertelt de maniere der vrouwen, Ende wat schaden dat dien ontmoeten, die der aenuechtinghen des vleesch aenhanghen, ende de becoringhe consenteren.

[p. 227v]

1

⁺ MIjn kint, bewaert mijne redene, ende verbercht mijne gheboden by v.

+ A vers 1

2

^* Bewaert mijn ghebot, soo sult ghy leuen, Ende mijn Wet, ghelijck uwen oochappel.

* Deute. 11.b.8. Num. 15.d.39.

3

Bintse aen uwe vingheren,^† schrijftse inde tafel ws herten.

† Prou. 3.a.3.

4

Segt totter wijsheyt: Ghy zijt mijne suster, ende noemt de cloeckheyt uwe vriendinne,

5

Dat^† ghy bewaert wordt voor dat vreemde Wijf, voor een andere die glatte woorden gheeft.

† Prou. 2.b.16. 5.a.3. 6.c.24.

6

Want voort Venster in mijnen huyse sach ick door de tralien,

7

Ende sach onder de Gecken, ende wert ghewaer onder de kinderen, eens Sotten Ionghelincx,

8

Die ghinck opter straten aen eenen hoeck, ende ghinck opten wech by haren huyse,

9

Inder schemeringe aenden Auont des daechs, doen het nacht wert ende doncker was.

10

⁺ Ende^* siet, doen ghemoette hem een wijf in Hoeren chieragie, listich,

+ B vers 10

* Prou. 9.b.13.

11

Wilt ende ongebonden, dat haer voeten in haren huyse niet gheblijuen en costen.

12

Nv is sy buyten, nv op de straten, ende loeret aen allen hoecken.

13

Ende greep hem, ende custede hem onbeschaemt, ende sprack tot hem:

14

Ick hebbe heden Dancoffer voor mi betaelt, voor mijne ghelofte.

15

Daerom ben ick wtgegaen, om v te gemoeten, om v aensicht vroech te soecken, ende hebbe v geuonden.

16

Ick hebbe mijn bedde ghechiert met chieragie, met bonten Tapisserie wt Egipten.

17

Ick hebbe mijnen Legher met Myrren, Aloës, ende Caneel besprenghet.

18

Coemt laet ons genoech boeleren, tot aenden Morgen, ende laet ons der liefden pleghen.

19

Want de man en is niet thuys, hy is eenen verren wech getrocken.

20

⁺ Hy heeft den gheltsack met hem genomen. Hy sal eerst op het Feest weder thuys comen.

+ C vers 20

21

Sy^† becoute hem met veel woorden, ende creech hem met haren glatten monde.

† Eccle. 7.d.27.

22

Hy volchde haer terstont na, gelijc eenen Osch ter vleeschbanck geleydt wort, ende als totten boeyen daermen de Sotten mede castijt,

23

Tot dat sy hem metten pijle, de leuere vanden anderen cloofde. Ghelijck eenen Voghel totten stricke haest, ende en weet niet, dattet hem dat leuen gheldet.

24

Soo ghehooret my nv mijne kinderen, ende merct op de reden mijns monts.

25

En laet v herte niet wijcken op haren wech, ende en laet v niet verleyden op haerder banen.

26

Want sy heefter vele ghewont ende gheuellet, ende alderley machtighe zijn van haer verworcht.

27

Haer huysen zijn weghen ter Hellen, daermen onderwaerts vaert in des doots Camer.