Den Bibel, Inhoudende dat Oude ende Nieuwe Testament (Biestkensbijbel)

¶ Dat .vj. Capittel.

¶ Waerschout voor borghe te worden, vermaent den tragen tot arbeyt, bewijst de schalckheyt der valscher Clappaerts ende der oproerders, waerschout ons voor ouerspel, want die schadelijcker is dan dieuerye.

1

⁺ MIjn kint,^† wort ghy borghe voor uwen naesten, soo hebt ghy uwe hant by eenen vreemden verknoopt.

+ A vers 1

† Prou. 11.b.15. 17.c.18. 20.c.16 22.d.26. 27.b.13.

2

Ghy zijt verknoopt metter redene ws monts, ende gheuanghen metter redene ws monts.

3

Soo doet doch mijn kint also, ende verlost v. Want ghy zijt uwen naesten inde handen ghecomen, loopt haest ende drijuet uwen naesten.

4

En laet uwe ooghe niet slapen, noch uwe oogen scheel niet sluymeren.

5

Verlost v als een Rhee vander hant, ende ghelijck eenen Voghel wt der hant des Vogeluanghers.

6

Gaet henen totter miere, ghy luye, siet haer weghen aen, ende leert.

7

^† Hoe wel dat sy gheenen Vorst, noch Hooftman, noch Heere en heeft,

† Prou. 20.a.4. 30.c.25. Prou. 13.a.4.

8

So bereit si nochtans haer broot inden Somer, ende vergadert hare spijse inden oogst.

9

Hoe^* lange ligt ghy Luyaert? Wanneer wilt ghy opstaen van uwen slaep?

* Pro. 24.d.33

10

⁺ Ia slapet noch een weynich, sluymert noch een weynich, legt de handen noch een weynich te hoope, dat ghy slaept,

+ B vers 10

11

So sal v de armoede verrasschen gelijck eenen wande-laer, ende dat Commer, ghelijck een gewapent man.

12

Een loos mensche, een schadelijc man, gaet met eenen verkeerden monde,

13

^† Wencket metten oogen, beteekent metten Voeten, wijset met den vingheren,

† Prou. 10.b.10 16.d.30. Eccle. 27.d.25.

14

Leyt altijt op wat quaets ende verkeerts toe in zijn herte, ende richtet kijuagie aen.

15

Daerom^† sal hem onuersiens zijn ongheual comen, ende sal snellijck te stucken ghebroken worden, datter gheen hulpe zijn en sal.

† Iere. 15.b.8. 1.Thess. 5.a.3. Prou. 24.c.22

16

Dese ses stucken hatet de HEEre, ende aen tseuenste heeft hy een afgrijselijcheyt.

17

^† Hoouaerdighe oogen:^‡ Valsche tonghen:^* Handen die onschuldich bloet storten:

† Psal. 18.c.28.

‡ Pro. 12.d.22.

* Iere. 7.a.6.

18

Een herte dat met quade listicheyt omgaet:^† Voeten die snel zijn om schade te doen.

† Pro. 1.a.16.

19

Een^‡ valsche ghetuyghe die vermetelijck lueghen spreect: Ende die twist tusschen broeders aenricht.

‡ Exo. 20.b.16 Susan. e.49.

20

^+* Mijn kint, bewaert de geboden ws Vaders, ende en laet de Wet uwer moeder niet varen.

+ C vers 20

* Prou. 1.a.8.

21

Bintse te hoope op v herte altijt^‡ ende hangtse aen uwen hals.

‡ Prou. 3.a.3.

22

Als^* ghy gaet, dat sy v gheleyden. Als ghy v nederlegt, dat sy v bewaren. Als ghy ontwaect, dat sy v gespreke zijn.

* Prou. 3.c.23.

23

Want^‡ dat ghebot is een keersse, ende de Wet een licht, ende de straffingen der disciplinen is eenen wech des leuens,

‡ Ps. 119.o.105 Psal. 19.b.9.

24

^* Op dat ghy bewaert wort voor den quaden wijue, voor de glatte tonghe der vreemder.

* Pro. 5.a.3. 7.a.5.

25

^† En laet v haerder schoonheyt niet ghelusten in uwer herten, Ende en veruangt v niet aen haren wijnbrauwen.

† Matt. 5.c.28.

26

Want een Hoere brengt eenen om dat broot: Maer een gehouwede vrouwe vangt dat edele leuen.

27

Can oock yemant een vyer inden boesem behouden, dat zijne cleederen niet en bernen?

28

Hoe soude yemant op colen gaen, dat zijne voeten niet verbernt en souden worden?

29

Also gaet het dien, die tot zijns naesten wijf gaet. Daer en blijft niemant ontschuldich, diese aentast.

30

Het en is eenen dief niet soo groote schande, wanneer hy steelt om zijn siele te versaden, dewijle dat hem hongert.

31

^† Ende ist dat hy beuonden wort, so gheeft hijt seuenuout weder, ende gheeft ouer allet goet in zijnen huyse.

† Exod. 22.a.1.

32

^* Maer die met eenen wijue ouerspel doet, die is een Sot, die brengt zijn leuen int verderuen.

* Leuit. 20.b.10 Deut. 22.c.22.

33

Daer toe ouercoemt hem plaghe ende schande, ende zijne schande en wort niet wtghedaen.

34

Want de verbolgentheyt des Mans ijuert, ende en spaert niet ter tijt der wraken:

35

Ende en aensieghet gheenen persoon, die daer versoene, ende en neemtet niet aen, al wildet ghy schoon veel schencken.