Den Bibel, Inhoudende dat Oude ende Nieuwe Testament (Biestkensbijbel)

¶ Dat .v. Capittel.

¶ Vermaninge totter wijsheit, waerschout ons de wijsheyt voor de vrouwen, ende alle aenuechtinghe, Ende vertelt oock wat schade daer wt coemt, alsmen dien aenhangt, Leert ooc datmen den ghehouden vriendelijck bystaen sal, ende beschrijft oock deynde der godloosen.

1

⁺ MIin kint, merct op mijne wijsheyt, neycht uwe ooren tot mijner leeringhe,

+ A vers 1

2

Dat ghy behoudt goeden raet, ende uwen mont wete onderscheyt te hebben.

3

Want^† de lippen der Hoeren zijn soete, als Honichseem, ende haer kele is ghelatter dan Olie.

† Prou. 2.b.16. 6.c.24. 7.a.5.

4

Maer daer na bitter, ghelijck Alseme, ende scherp ghelijck een tweesnijdende sweert.

5

Haer Voeten loopen totten doot onderwaerts, haer ganghen vercrijghen de Helle.

6

Sy en gaet niet stracx opten Wech des Leuens,^† hare treden zijn onghestadich, dat sy niet en weet waer sy gaet.

† Prou. 4.c.19.

7

^+* Soo gheeft my nv ghehoor mijne kinderen, ende en wijct niet vander redene mijns monts.

+ B vers 7

* Prou. 1.a.8. 4.a.1.

8

^† Laet uwe wegen verre

† Eccle. 9.a.6.

[p. 227r]

van haer zijn, ende en ghenaket niet totter dueren haers huys,

9

Dat ghy den vreemden uwe eere niet en geeft, ende uwe Iaren den grouwelijcken.

10

Dat gheen vreemde hem van uwen vermoghen en versade, ende uwen arbeyt niet en sy in eens anders huys,

11

Ende moet daer na suchten, als ghy v lichaem^† ende goet verteert hebt: Ende seggen:

† Prou. 29.a.3.

12

Och hoe hebbe ick de onderwijsinghe ghehaet? Ende mijn herte de straffinghe versmaet?

13

Ende en hebbe niet gehoort de stemme mijnder Leeraers, ende mijne oore niet geneycht totten ghenen die my leerden.

14

Ic ben schier in alle ongheluck ghecomen, voor alle lieden, ende allen volcke.

15

⁺ Drinct water wt dijnen bornputte, ende vloeden wt uwer fonteynen.

+ C vers 15

16

Laet uwe fonteynen wt vloyen, ende de waterbeken op de straten.

17

Maer hebbet ghijse alleen, ende niemant vreemts met v.

18

Vwe fonteyne sy gesegent^* ende verblijt v vanden wijue uwer ioncheyt.

* Deut. 24.a.5. Eccle. 9.b.9.

19

Sy is lieffelijck als een Hinde, ende gratieus als een Rhee. Laet v haer liefde altoos versaden, ende vermaect v altoos in haerder liefden.

20

Mijn kint, Waer om wilt ghy v aen de vreemde vermaken, ende omhelset een andere?

21

Want^† yeghelijcx wegen zijn stracx voor den HEEre, ende hy metet ghelijck alle haer gangen.

† Iob. 31.a.4. 34.c.22.

22

^* De misdaet des Godloosen sal hem vanghen, ende sal metten strick zijnder sonden gehouden worden.

* Pro. 29.a.6. Psal. 9.c.17.

23

^† Hy sal steruen, Daerom, dat hy hem niet en wil laten onderwijsen, ende om zijnder grooter dwaesheyt wille, en salt hem niet wel gaen.

† Prou. 29.a.1. 15.b.10. Sap. 3.c.11.