Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

¶ Een vaderlijcke vermaninghe, der wijsheyt aen te hanghen met den profijte daer aen hanghende, ende hoe datmen de leden des lichaems voort quaet behoeden sal.

1

⁺ HOort^† mijne kinderen de onderwijsinghe ws Vaders, merct op dat ghy leert ende cloeck wort.

+ A vers 1

† Prou. 1.a.8. 5.b.7.

2

Want ick gheue v een goede leeringhe, en verlaet mijne Wet niet.

3

Want ic was ooc mijns Vaders soon, een teedere ende een eenighe voor mijnder moeder.

4

Ende hy leerde my, ende sprac:^† Laet v herte mijne woorden aennemen, hout mijne gheboden, so suldy leuen.

† Deuter. 6.b.6. 11.c.18. 32.g.46.

5

Neemt aen de wijsheyt, neemt aen verstant, en vergetet niet ende en wijct niet vander redene mijns monts:

6

En verlaetse niet, soo sal sy v bewaren, hebtse lief, so sal si v behoeden.

7

Want der wijsheyt beghintsel is, wanneermense gheerne hoort, ende de cloecheyt lieuer heeft, dan alle goeden.

8

^† Achtse hooch, soo sal sy v verhooghen, ende sal v tot eeren maken, ist dat ghijse omuangt.

† Deut. 26.d.19

9

Sy sal v hooft schoon toemaken, ende sal v verchieren met eender schoonder Croonen.

10

⁺ Soo hoort mijn kint, ende neemt aen mijne redene,^* so sullen uwer goeder iaren veel worden.

+ B vers 10

* Prou. 9.b.11. 10.d.27.

11

Ick wil v op den wech der wijsheyt leyden. Ick wil v op de rechte bane leyden,

12

Dat wanneer ghy gaet, uwen ganck v niet suer en worde, ende als ghy loopt, dat ghy v niet en stoot.

13

Vaet de onderwijsinghe, en laet daer niet van af, bewaertse: Want sy is v leuen.

14

^† En coemt niet op der Godlooser padt, ende en treet niet op den wech der boosen.

† Psal. 1.a.1.

15

Laet hem varen, ende en gaet niet daer in. Wijct van hem, ende gaet voorby.

16

Want^† sy en slapen niet, sy en hebben quaet gedaen, ende sy en rusten niet, het en sy dat sy schade hebben ghedaen,

† Psal. 10.b.8. Prou. 1.a.11.

17

Want sy voeden hen van ongodlijcken broode, ende drincken vanden Wijn des vermetenheyts.

18

^+* Maer der gerechtiger padt schijnt ghelijck een licht, dat daer voort gaet, ende lichtet totten vollen dach toe.

+ C vers 18

* Luce. 11.d.36. Sap. 3.b.7.

19

^† Maer der Godlooser wech is als donckerheyt, ende en weten niet waer sy vallen sullen.

† Iob. 5.b.15. Esaie. 59.b.10 2.Petr. 1.b.9.

20

Mijn sone merct op mijne woorden, ende neycht v oore tot mijnder redene.

21

^‡ En laetse niet van uwen ooghen comen, behoutse in uwer herten.

‡ Num. 15.d.39 Deut. 11.c.18.

22

Wandt sy zijn dat leuen, den ghenen diese vinden, ende gesont haren geheelen Lijue.

23

Bewaert v herte met alder neersticheyt, want daer wt gaet dat leuen.

24

Doet van v den verkeerden mondt, ende laet de lastermont verre van v zijn.

25

Laet uwe ooghen stracx voor hen sien, ende uwe oochschelen, recht voor v henen sien.

26

Laet uwen voet gelijck voor hem gaen, so gaet ghy ghewisse.

27

^† En wijcket niet ter rechter noch ter slincker handt. Weyndet uwen Voet van dat quade.

† Deut. 4.a.2. 5.d.32. 17.c.16. 28.b.14. Iosue. 23.a.6. Esaie. 30.d.21