Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

¶ Hy bewijst wat profijt dat wt der wijsheyt coemt.

1

⁺ MIin kint^* wilt ghy mijn reden aen nemen, ende mijne geboden by v behouden,

+ A vers 1

* Iob. 22.c.22.

2

Soo laet uwe oore op wijsheyt achtinghe hebben, ende neycht dijn herte met ernste daer toe.

3

Want ist dat ghy met ernste daer na roept, ende daerom bidt,

4

Ist dat ghyse soect ghelijck siluer, ende daer na vraecht, als na de schatten,

5

Soo sult ghy de vreese des HEEren verstaen, ende de kennisse Gods vinden.

6

^† Want de HEEre gheeft wijsheyt, ende wt zijnen monde coemt kennisse ende verstant.

† Iacobi. 1.a.5. Eccles. 1.a.1. Dan. 2.c.21.

7

Hy latet den oprechten gelucken, ende beschermet de vrome,

8

Ende behoet die, die recht doen, ende bewaert den wech zijnder heylighen.

9

Dan sult ghy verstaen gerechticheyt ende Recht, ende vromicheyt, ende allen goeden wech.

10

Ist dat de wijsheyt v ter herten gaet ende dijne siele lust heeft tot de kennisse,

11

^† So sal v den goeden Raet bewaren, ende verstant sal v behoeden,

† Sap. 8.b.9.

12

Dat ghy verlost wort vanden wech der boosen, ende vanden verkeerden clappaerts,

13

Die daer verlaten de rechte bane, ende gaen duystere weghen.

14

Die hen verblijden quaet te doene, ende zijn vrolijck in haren verkeerden boosen wesen:

15

De welcke haren wech verkeeren, ende volghen den afwech.

16

^+* Dat ghy verlost wort van eens anders wijf, ende die niet uwe en is, die glatte woorden geeft,

+ B vers 16

* Prou. 5.a.3. 7.a.5.

17

Ende verlaet den Heere haerder ioncheyt, ende vergetet dat verbont haers Gods.

18

Want haer huys neyghet hem totten doot, ende hare gangen totten verlorene.

19

Alle die tot haer ingaen, die en comen niet weder, ende en aengrijpen den wech des leuens niet.

20

Op dat ghi wandelt op eenen goeden wech, ende blijft op de rechte bane.

21

^† Want de rechtuaerdige sullen inden Lande woonen, ende de vrome sullen daer inne blijuen.

† Psal. 37.b.9 69.e.38.

22

^‡ Maer de godloose worden wtgeroyt wt den Lande, ende de verachters worden daer wt verdaen.

‡ Iob. 18.d.17. Psal. 37.b.9. 101.b.8. 119.p.119.