Den Bibel, Inhoudende dat Oude ende Nieuwe Testament (Biestkensbijbel)

De spruecken Salomonis.

¶ Dat eerste Capittel.

¶ De Godlijcke wijsheyt roept ende vermaent ons door den mont Salomon, ende waerschout ons voor de schalcken, der welcker woorden, manieren, ende straffinghen hier ooc beschreuen worden.

1

⁺ DIT zijn de spruecken Salomonis des Conincx Israels, Dauidts soons,

+ A vers 1

2

^‡ Om te leeren wijsheyt ende^† tucht, verstant cloecheyt,

‡ 2.Tim. 3.b.16.

† Onderwijsinghe.

3

Gherechticheyt, recht ende^* billicheit.

* redelijcheyt.

4

^† Dat de slechte cloeck, ende de Iongelinghen vernuftich ende voorsichtich worden.

† Psal. 19.a.8.

5

Wie wijs is, die hooret toe, ende betert hem: Ende wie verstandich is, die laet hem raden,

6

Dat hy versta de spruecken ende hare bediedinghe, de leeringhe der wijsen ende hare bysprueken.

7

^† De vreese des HEEren is een beghinsel om te leeren. De Roekeloosen verachten wijsheyt ende tucht.

† Eccle. 1.c.16. Prou. 9.b.10. Iob. 28.c.29.

8

^* Mijn kint gheeft gehoor der onderwijsinghe ws Vaders, ende en verlaet dat ghebot uwer moeder niet.

* Prou. 4.a.1.

9

Want sulcx is een schoon verchieringhe uwen hoofde, ende een gulden keten aen uwen halse.

10

Mijn kint, als v de boose boeuen locken, soo en volcht niet.

11

Als sy seggen:^† Gaet met ons, wy willen op bloet loeren,^* ende den ontschuldighen sonder sake laghen legghen.

† Esai. 29.d.21

* Psal. 10.b.8.

12

Wy^† willense leuende

† Psa. 124.a.3

[p. 226r]

verslinden, gelijck de Helle, ende de vromen als die onderwaerts in den cuyle varen.

13

Wy willen groot goet vinden, wy willen onse huysen met roouen vullen.

14

Waget met ons, wy willen eenen buydel te samen hebben.

15

Mijn kint, en wandelt den wech niet met hen.^* Weert uwen voet van haren padt,^†

* 2.Cor. 6.c.17

† Pro. 6.b.18. Esaie. 59.a.7.

16

Want hare voeten loopen totten quade, ende haesten hen bloet te storten.

17

⁺ Want het is te vergheefs dat nette wt worpen, voor de oogen der vogelen.

+ B vers 17

18

Oock loeren sy selue onder malcanderen op haer bloet, ende deene staet den anderen na het leuen.

19

Alsoo doen alle ghierighe, dat deen den anderen dat leuen neemt.

20

^* De wijsheyt claecht daer buyten, ende laet haer hooren op de straten.

* Prou. 8.a.1.

21

Sy roept inde dueren voor aen der poorten onder dat volc. Sy spreect hare woorden in de stadt:

22

Hoe lange wilt ghy ghecken, gecken zijn? Ende de bespotters lust tot spotterie hebben, ende die Roekeloose de leeringe haten?

23

Keert v tot mijnder straffinghe. Siet, ick wil v mijnen gheest wt segghen, ende v mijne woorden condt doen.

24

^‡ Dewijle ick dan roepe, ende ghy weyghert v: Ick recke mijne hant wt, ende niemant en achtet daer op:

‡ Esaie. 65.b.11 66.a.4. Iere. 7.b.13. 35.c.15.

25

Ende latet varen alle mijnen raet, ende en willet mijne straffinge niet,

26

So wil ic ooc^† lachen in uwen ongeualle, ende v bespotten, als daer coemt dat ghy vreest.

† Psal. 2.a.4. 37.b.13. 59.b.9

27

⁺ Als ouer v coemt, ghelijck eenen storm dat ghy vreest, ende uwe ongheualle als een tempeest. Als ouer v benautheyt ende noot coemt.

+ C vers 27

28

Dan^† sullen sy my roepen, maer ick en sal niet antwoorden. Sy sullen my vroech soecken, ende niet vinden,

† Iob. 27.a.9. Psal. 18.d.42. Mich. 3.a.4. Esaie. 1.b.15. 4.Esd. 1.d.26

29

^* Daer om, dat sy hateden de leeringhe, ende en wilden de vreese des HEEren niet hebben,

* Rom. 1.d.28

30

En wilden mijns raets niet, ende lasterden alle mijne straffinghe,

31

Soo sullen si ooc eten vanden vruchten haers weechs, ende van haren raet sadt worden.

32

Dat den gecken lustet, dat doodetse, ende der Roekeloosen geluck, verdoetse.

33

^† Maer wie my ghehoor geeft, die sal seker blijuen, ende genoech hebben, ende gheen ongheluck vreesen.

† Prou. 3.c.24.