Den Bibel, Inhoudende dat Oude ende Nieuwe Testament (Biestkensbijbel)

¶ Den .Cxliiij. Psalm.

Eenen Psalm Dauids.

1

⁺GHelooft sy de HEEre mijn troost^* die mijn handen leert strijden, ende mijn vuysten crijghen.

+ A vers 1

* Psal. 18.d.35. 2.Reg. 22.e.35

2

^† Mijn goetheyt ende Borcht, mijn beschuttinghe, ende mijn verlossere, mijnen Schilt op dien ic betrouwe, die mijn volck onder my dwingt.

† Psal. 18.a.3.

3

HEEre^† wat is de mensche, dat ghy v zijnder so aenneemt? Ende des menschen kint, dat ghy hem so achtet?

† Psal. 8.a.5. Iob. 7.b.17.

4

De mensche is doch ghelijck niet,^* zijnen tijt vaert daer henen gelijck een scaduwe.

* 1.Par. 30.c.16 Iob. 8.a.9. Sap. 2.b.5. 5.b.9.

5

HEEre neycht uwe Hemelen ende daelt daer af, tast de berghen aen, dat sy roocken.

6

Laet blixemen ende verstroytse, schiet uwe stralen, ende verschrictse.

7

⁺Seyndt uwe hant vander hoochten, ende verlost my, ende beschermt my van groote wateren, vander hant der vreemder kinderen.

+ B vers 7

8

Der welcker leere en is gheen nutte, ende haer wercken zijn valsch.

9

Godt ick wil een nieu Liedt singhen: Ic wil v spelen opten Psalter van thien snaren,

[p. 225r]

10

Ghy die den Coninghen de ouerwinninghe gheeft, ende verlost uwen knecht Dauid van tmoordissche sweert des boosen.

11

⁺Verlost my oock, ende beschermt my vander hant der vreemder kinderen, der welcker leere en is geen nutte, ende haer wercken zijn valsch.

+ C vers 11

12

^* Dat onse sonen opwassen in haerder iuecht, gelijck de planten, ende onse dochteren, ghelijck de wtgehouwen Arkener, ghelijck als de Palleysen.

* Deut. 28.a.11.

13

Ende onse cameren vol zijn, die wtgeuen connen den eenen voorraet na den anderen, dat onse schapen draghen duysent, ende hondert duysent, op onse Dorpen.

14

Dat onse Ossen veel arbeyts voort brenghen, datter gheen schade, geen verlies noch claghe op onse straten en sy.

15

Wel den volcke, dient alsoo gaet:^† Maer wel den volcke, diens de HEEre een Godt is.

† Psal. 33.b.12.