Den Bibel, Inhoudende dat Oude ende Nieuwe Testament (Biestkensbijbel)

¶ Den .Cxlv. Psalm.

Eenen Lof Dauids.

1

⁺ICk wil v verhooghen mijn God, ghy Coninck: Ende uwen Naem louen altoos ende eewelijck.

+ A vers 1

2

Ick wil v dagelijcx louen, ende uwen Name roemen altoos ende eewelijck.

3

^† De HEEre is groot ende seer loeflijc: Ende zijne grootheyt is onwtsprekelijck.

† Psal. 69.a.4. Eccl. 43.d.42

4

Kindts kinderen sullen uwe wercken prijsen, ende van uwer ghewelt seggen.

5

Ick wil spreken van uwen heerlijcken schoonen^† prale, ende van uwen wonderlijcken.

† Chieraet.

6

Datmen sal spreken van uwe heerlijcke daden, ende datmen vertelle uwe heerlijcheyt.

7

Datmen prijse uwe groote goetheyt, ende uwe gherechticheyt roeme.

8

^* Ghenadich ende ontfermhertich is de HEEre, verduldich, ende van grooter goetheyt.

* Exod. 34.a.6 Psal. 86.c.15. 103.a.8. 116.b.5 Ione. 4.a.2. Iohel. 2.c.13. 2.Esd. 9.c.17.

9

De HEEre is allen goedertieren, ende ontfermt hem ouer alle zijne wercken.

10

⁺Alle uwe wercken HEEre sullen v dancken, ende uwe heylighen v louen.

+ B vers 10

11

Ende de eere ws Conincrijcx roemen ende van uwer gewelt spreken.

12

Dat den kinderen der menschen uwe ghewelt kenlijck worde, ende die eerlijcke chieragie ws Conincrijcx.

13

^† Dijn Rijck is een eewich Rijc, ende uwe heerschappie duert voort ende voort.

† Psal. 45.b.7.

14

^* De HEEre onderhout alle die daer vallen, ende rechtet op alle die neder gheslaghen zijn.

* Psal. 34.c.20. 37.d.24. Pro. 24.c.16.

15

Alder ooghen verwachten op v,^† ende ghy geeft haer hare spijse tot zijnder tijt.

† Ps. 136.b.25.

16

⁺Ghy doet uwe hant open, ende veruullet al wat leeft met welbehagen.

+ C vers 16

17

De HEEre is rechtueerdich in alle zijne weghen, ende heylich in alle zijne wercken.

18

^* De HEEre is na by allen, die hem aenroepen, alle die hem met ernste aenroepen.

* Deut. 4.a.7

19

^† Hy doet wat de Godvreesende begeren, ende hoort haer roepen, ende helpt haer.

† Ioan. 15.a.7 1.Ioan. 3.c.22. Matt. 18.c.19. Marc. 11.c.24.

20

De HEEre bewaert alle die hem beminnen, ende sal alle godloose vernielen.

21

Mijnen mondt sal des HEEren lof seggen: Ende alle vleesch loue zijnen heylighen Naem altoos ende eewelijck.