Den Bibel, Inhoudende dat Oude ende Nieuwe Testament (Biestkensbijbel)

¶ Den .Cxlj. Psalm.

Eenen Psalm Dauids.

1

⁺HEEre, ick roepe tot v, haest v tot my: Verneemt mijn stemme, wanneer ick v aenroepe.

+ A vers 1

2

Mijn ghebet moete voor v dueghen, ghelijck eenen^† Rueckoffer, mijnder handen^‡ opheffen, als eenen auont offer.

† Exo. 30.b.8. Apoc. 8.a.4.

‡ Opheffinge.

3

HEEre^* behoedt mijnen mont, ende bewaert mijn lippen.

* Eccle. 23.a.1.

4

En neycht mijn herte niet op yet quaets, een ongodlijck wesen te leyden met den quaetdoenders, dat ick niet en ete van dien dat haer belieft.

5

^* De gherechtige slae my vriendelijck ende straffe my, dat sal my soo wel doen als eenen^‡ Balsam op mijn hooft, want ick bidde alleneen, dat sy my niet schade en doen.

* Prou. 9.a.8. 15.d.31. 25.b.12

‡ dat is, de beste Olye

6

⁺Haer Leeraers moeten ghestortet worden ouer eenen steen, soo salmen dan mijne leere hooren, datse lieffelijck sy.

+ B vers 6

7

Onse gebeenten zijn verstroyt tot der Hellen, gelijck een dat Lant doorschuert ende doorwoelet.

8

^† Want op v HEEre HEEre, sien mijn ooghen:^* Ick betrouwe op v, en verstoot mijn siele niet.

† Psal. 123.a.2.

* Psal. 7.a.1. 31.a.1. 71.a.1.

9

^* Bewaert my voor den strick dien sy my gheleyt hebben, ende voor de vallen der quaetdoenders.

* Psal. 35.a.7. 57.b.7.

10

^† De godloose moeten in haer eyghen Netten vallen, met malcanderen, maer ick ghestadelijck voorby gaen.

† Psal. 7.b.16. 9.c.16. 35.b.8. Prou. 26.c.27 Eccles. 28.a.2. Eccle. 10.b.4. 1.Hest. 7.b.10 Susan. g.62. Dani. 6.e.24.