Den Bibel, Inhoudende dat Oude ende Nieuwe Testament (Biestkensbijbel)

¶ Den .Cxl. Psalm.

1

Eenen Psalm Dauids voor te singen.

2

⁺VErlost my HEEre vande boose menschen: Behoet my voor de vermetene lieden.

+ A vers 2

3

Die boosheyt dencken in haerder herten, ende dagelijcx Crijch aenrichten.

4

Sy scherpen haer tonghen ghelijc een Slanghe:^† Aderen fenijn is onder haer lippen. Sela.

† Rom. 3.b.13.

5

Bewaert my HEEre voor de hant der godloosen. Behoedt my voor de vermetene lieden, die mijnen ganck dencken om te stooten.

6

De hoouaerdighe^† legghen my stricken, ende breyden my seelen wt tot een Net, ende stellen my Vallen aen den wech. Sela.

† Psal. 35.a.7. 141.b.9. Iere. 18.c.22.

7

Maer ick segge totten HEEre, ghy zijt mijn Godt: HEEre verneemt de stemme mijns smeeckens.

8

⁺HEEre, HEEre mijn stercke hulpe ghy beschermt mijn hooft ter tijt des strijts.

+ B vers 8

9

HEEre en laet den godloosen zijne begheerte niet, en sterct zijnen moetwille niet: Sy mochten haer dies verheffen. Sela.

11[10]

^† Dat ongeluck daer af mijn vianden raetslagen,^* moet op haren cop vallen.

† Psal. 7.b.17.

* Eccl. 10.a.4 Pro. 26.c.27. Eccle. 28.a.2. 1.Hest. 7.b.10

12[11]

Hy sal stralen ouer haer schudden, hy salse met vier diep inde Aerde slaen, datse nemmermeer niet op en staen.

[p. 224v]

13[12]

Eenen boosen mont en sal gheen gheluck hebben op Aerden: Een vermeten boos mensch sal veriaecht ende ghestortet worden.

14[13]

^* Want ick weet, dat de HEERE des ellendighen sake, ende des Armen recht wtuoeren sal.

* Psal. 10.b.18.

15[14]

Oock sullen de gherechtighe uwen Naem dancken, ende de vroome sullen voor dijn aensicht blijuen.