Den Bibel, Inhoudende dat Oude ende Nieuwe Testament (Biestkensbijbel)

¶ Den .Cxxxix. Psalm.

Eenen Psalm Dauidts voor te singen.

1

⁺HEEre, ghy ondersoect my,^* ende kent my.

+ A vers 1

* Psal. 33.b.15.

2

Ick sitte oft stae op, so weet ghijt:^† Ghy verstaet mijn ghedachten van verre.

† Iob. 42.a.1. Eccle. 43.a.4

3

^* Ick ga ofte ligge, so zijt ghy om my, ende siet alle mijn wegen.

* Pr. 20.d.24 Iere. 10.d.23.

4

Want siet, daer en is gheen woort op mijn tonghe, dat ghy HEEre niet alle en weet.

5

Ghy beschicktet wat ick voor oft na doe, ende hout uwe hant ouer my.

6

Sulcke bekennisse is my te wonderlijck ende te hooghe, ick en cans niet begrijpen.

7

^* Waer sal ic henen gaen voor uwen gheest? Ende waer sal ick henen vlieden voor uwe aensicht?

* Iere. 23.d.23. Sap. 16.c.15. Iob. 13.a.2.

8

^† Voer ick in den Hemel, soo zijt ghy daer: Maecte ick mijn bedde in de Helle, siet, soo zijt ghy oock daer.

† Amo. 9.a.2.

9

Name ick vlueghelen des dageraets, ende bleue aen de wterste See.

10

⁺So soude my doch uwe hant aldaer leyden, ende uwe rechter hant my houden.

+ B vers 10

11

Spreke ick, duysternissen moghen my bedecken, soo moet den nacht oock licht om my zijn.

12

Want oock de duysternisse en is niet duyster by v. Ende den nacht licht gelijc den dach: Duysternisse is gelijc dat licht.

13

^* Want ghy hebt mijn nieren in uwe ghewelc: Ghy waert ouer my in moeders lijf.

* Iere. 17.b.10.

14

Ick dancke v daer voor, dat ick wonderlijc gemaect ben:^† Wonderlijck zijn uwe wercken, ende dat bekent mijn siele wel.

† Apoc. 15.a.3.

15

Mijn gebeente en was v niet verborghen, doen ick int berborghen ghemaect wert, doen ick ghebeelt wert onder inder Aerden.

16

^+* Vwe oogen sagen my, doen ick noch onbereyt was: Ende alle daghen waren in uwen boec gheschreuen, die noch worden souden, ende der seluer noch gheene daer en was.

+ C vers 16

* Iere. 1.a.5.

17

Maer hoe costelijc zijn voor my Godt uwe gedachten? Hoe is haerder een soo grooten summe?

18

Soude ickse tellen, so soude haerder meer zijn dan des sants, wanneer ic ontwake, ben ick noch by v.

19

Och Godt, dat ghy doodede de godloosen, ende de bloetghierighe van my wijcken moesten.

20

Want sy spreken van v lasterlijck, ende uwe vianden verheffen haer sonder oorsake.

21

Ick hate ymmers HEEre die v haten, ende tverdriet my op haer, dat sy haer teghen v setten.

22

Ick hatese in rechten ernste, daerom zijn sy my viant.

23

^† Ondersoect my Godt, ende onderuint mijn herte: Proeft my, ende onderuint hoe ict meyne.

† Psal. 26.a.2.

24

Ende siet oft ick op boosen wech ben: Ende leydt my opten eewigen wech.