Den Bibel, Inhoudende dat Oude ende Nieuwe Testament (Biestkensbijbel)

¶ Den .Cix. Psalm.

1

Eenen Psalm Dauids voor te singen.

2

⁺GOdt mijnen roem, en swijget niet.

Want si hebben haer godloose ende valsche monden teghen my open ghedaen, ende spreken tegen my met valscher tonghen.

+ A vers 2

3

Ende si spreken vergiftich tegen my ouer al, ende strijden teghen my sonder oorsake.

4

Daer voor dat icse beminne, zijnse teghen my, maer ick bidde.

5

^† Sy bewijsen my quaet voor goet: Ende haet voor liefde.

† Psal. 35.b.12.

6

^† Settet godloosen ouer hem,^* ende de Satan moet staen tot zijnder rechter hant.

† Leuit. 26.c.17

* Sach. 3.a.1.

7

Wie hem den seluen laet leeren, diens leuen moeten godtloos zijn, ende zijn ghebet moete sonde zijn.

8

^† Sijnder dagen moeten weynich worden, ende zijn Officie moete een ander ontfanghen.

† Ioan. 17.b.12. Act. 1.d.20.

9

⁺Sijn kinderen moeten weesen worden, ende zijn wijf een weduwe.

+ B vers 9

10

Sijn kinderen moeten verdwaelt ende verbijstert gaen, ende bedelen, ende soecken, als die verdoruen zijn.

11

De woeckenaers moeten wt suyghen al wat hy heeft, ende vreemde moeten sine goeden roouen.

12

Ende niemant en moete hem weldaet bewijsen, ende niemant en ontferme hem zijnder Weesen.

13

Sijn nacomelinghen moeten wtgheroeyt worden: Haren Naem moete int anderde lidt, wtghedaen worden.

14

Sijner vaderen misdaet moete ghedacht worden voor den HEERE, ende zijns moeders sonde en moete niet wtgedaen worden.

15

De HEEre en moetese nemmermeer wt den ooghen laten, ende haer gedachtenisse moet wtgheroeydt worden op Aerden.

16

⁺Daerom dat hy so gants geen barmherticheyt en hadde:^† Maer veruolchde den ellendigen ende Armen, ende den bedroefden, dat hy hem doodede.

+ C vers 16

† Psal. 10.b.8. 37.b.12.d.32. Exod. 23.a.7. Esaie. 3.c.14.

17

Ende hy woude den vloeck hebben, die sal hem ooc comen. Hy en wilde den seghen niet, so sal hy oock verre van hem blijuen.

18

Ende hy trock aen den^† vloeck ghelijc zijn Hemde, ende is in zijn inwendighe ghegaen ghelijc water, ende ghelijc Olie in zijn ghebeente.

† Psal. 10.a.7. Eccle. 23.b.9. 27.c.17.

19

So worde hy hem ghelijck een cleedt dat hy aen hebbe, ende als een gordel, daer hy hem altijt mede gorde.

20

Alsoo gheschie den ghenen vanden HEEre die my contrarie zijn, ende spreken quaet teghen mijn siele.

21

Maer ghy HEEre HEEre, zijt met my om ws Naems wille: Want uwe ghenade is mijnen troost: Verlost my.

22

^† Want ick ben arm ende ellendich, mijn herte is versleghen in my.

† Psal. 86.a.1.

23

^† Ick vare wech ghelijck een schaduwe die verdreuen wort, ende worde veriaghet, ghelijck de Sprinchanen.

† Psal. 102.b.12. 144.a.4. 1.Par. 30.c.15.

24

⁺Mijn knyen zijn swack van vasten, ende mijn vleesch is magher, ende en heeft gheen vet.

+ D vers 24

25

^* Ende ick moet haren spot zijn, wanneer si my sien, schudden si haren Cop.

* Psal. 22.a.8.

26

Staet my by HEERE mijn Godt, helpt my nae uwer ghenaden.

27

Dat si beuinden, dattet sy dijne hant, dat ghy HEEre sulcx doet.

28

Vloecken si, soo seghent ghy: Setten si hen teghen my, soo moeten si te schande worden, maer v knecht moet hem verblijden:

29

Mijn Wedersegghers moeten met smaet aenghetrocken worden, ende met haerder schanden ghecleet worden, ghelijck met eenen rock.

30

Ick wil den HEERE seer dancken met mijnen mont, ende hem roemen onder velen.

31

Want^† hy staet den Armen ter rechter hant, dat hy hem helpe van dien, die zijn leuen veroordeelen.

† Psal. 16.b.9. Prou. 3.c.25.