Den Bibel, Inhoudende dat Oude ende Nieuwe Testament (Biestkensbijbel)

¶ Den .Cv. Psalm.

1

⁺DAnct^† den HEERE, ende predict sinen Naem: Vercondicht zijn doen onder de volcken.

+ A vers 1

† 1.Par. 17.b.8. Esaie. 12.a.4.

2

Singt van hem, ende looft hem: spreect van alle sine wonderen.

3

Roemt sinen heylighen Naem: Dat herte der ghenen, die den HEEre soecken, verhueghe hem.

4

Vraecht naden HEEre, ende na zijn macht: Soect zijn aensicht alle weghen.

5

Gedenct zijnder wonder wercken, die hy ghedaen heeft, zijnder wonderen ende zijns woorts.

6

Ghy dat saet Abrahams zijns knechts, ghy kinderen Iacobs zijns wtuercorens.

7

⁺Hy is de HEEre onse God, hy richtet in de gheheele werelt.

+ B vers 7

8

Hy denckt eewelijcken aen zijn verbont, des woorts dat hy toegeseyt heeft op veel duysenden, voort ende voort.

9

Dat hy gemaect heeft^† met Abraham, ende des eedts^* met Isaac.

† Gene. 17.b.7.

* Gen. 26.a.3.

10

^‡ Ende settede dat selue Iacob tot eenen rechte, ende Israel tot een eewich verbondt.

‡ Gen. 28.c.13.

11

Ende sprac: V wil ick dlant Chanaan gheuen, dat Lot uwer eruen.

12

Doen si weynich ende cleyn waren, ende vreemdelinghen daer inne.

13

Ende si trocken van volcke tot volcke, vanden eenen Conincrijcke totten anderen volcke.

14

Hy en liet gheenen mensche hen schade doen,^* Ende strafte Coninghen om haren wille.

* Gene. 12.d.17 20.a.3.

15

^† En tast mijn Gesalfde niet aen: Ende en doet mijn Propheten gheen leedt.

† 1.Pa. 17.c.22.

16

⁺Ende hy liet eenen dieren tijt int lant comen: ende ontrack alle voorraet des broots.

+ C vers 16

17

Hy sant eenen man voor haer henen:^* Ioseph wert tot eenen knecht vercocht.

* Gene. 37.f.36

18

Sy^† dwongen zijn voeten inden stoc, zijn lijf moeste in ijseren ligghen.

† Gen. 39.e.20

19

Tot dat zijn woort quam, ende hem de reden des HEEren doorlouterde.

20

^* Doen sandt de Coninck henen, ende liet hem los gheuen: De HEERE ouer volcken hiet hem wt laten.

* Gen. 41.b.14

21

^† Hy settede hem tot eenen HEEre ouer zijn huys, tot eenen heerschapper ouer alle sine goeden.

† Gen. 41.f.40

22

Dat hy zijn Vorsten onderwees nae zijnder^† wijse, ende zijn Ouders wijsheyt leerde.

† Behaghen.

23

^† Ende Israel tooch in Egipten, ende Iacob werdt een vreemdelinc int lant Ham.

† Gene. 46.a.1.

24

^* Ende hy liet zijn volc seer wassen: Ende maectese machtigher dan haer vianden.

* Exod. 1.a.7. Acto. 7.c.17.

25

⁺Hy verkeerde der ghener herten, dat si op zijn volck gram werden, ende dachten zijn knechten met list te dempen.

+ D vers 25

26

^* Hy sant sinen knecht Moysen: Aaron dien hy vercoren hadde.

* Exodi. 3.b.10. 4.e.29.

27

Die selue deden zijn^† teekenen onder hen, ende sine wonderen int lant Ham.

† Exo. 7.b.10.

28

^† Hy liet duysternisse comen ende maectet duyster: Ende en waren niet onghehoorsaem sine woorden.

† Exodi. 10.c.21 Sapi. 17.a.2.

29

^* Hy veranderde haer wateren in bloet, ende doodede haer visschen.

* Exod. 7.d.20. Psa. 78.e.44

30

Haer lant wriemelde^† Vorschen wt, in de Cameren haerder Coninghen.

† Exod. 8.b.6

31

Hy sprack: Doen quamen boose^* wormen, Luysen in alle haer palen.

* Exod. 8.e.24

32

^† Hy gaf hen haghel tot reghen, vier vlammen, in haren Lande.

† Exodi. 9.e.23. Psalm. 78.e.47.

33

Ende sloech haer Wijnstocken ende Vigheboomen, ende track in stucken de Boomen in hare palen.

34

Hy sprac: Doen quamen^† Sprinchanen, ende^* Keuers sonder ghetal.

† Exod. 10.d.12

* Cruyt wormen. Rupsenen

35

Ende si aten alle dat gras in haren Lande, ende aten de vrucht op haren velde.

36

^+* Ende sloech alle eerstgheboorte in Egipten, alle eerste Erfghenamen.

+ E vers 36

* Exod. 12.e.29. Sapi. 18.c.11.

37

^† Ende hy leydese wt met siluer ende gout, ende onder haren stammen en was gheen crancke.

† Exo. 12.e.35.

38

Egypten wert vrolijck dat si wt trocken, want haer vreese was op haer gheuallen.

39

^* Hy breydde een Wolcke wt tot eenen decksele, ende vier om des nachts te lichtene.

* Exod. 13.d.21. 1.Cor. 10.a.1.

40

Sy baden, doen liet hy^† quackelen comen, ende hy versadese met Hemels broot.

† Exod. 16.c.14 Sapi. 16.a.2.

41

^* Hy opende den steen, doen vloten wateren daer wt, dat Beken liepen in de dorre woestijne.

* Exod. 17.b.6. Num. 20.b.11. 2.Esd. 9.d.20.

42

^† Want hy dacht aen zijn heylich woort, Abraham sinen knechte gesproken.

† Gen. 17.b.7

43

Alsoo leydde hy zijn volck wt met

[p. 218v]

vruechden, ende zijn wtuercoren met ghenuechte.

44

^* Ende gaf hen de Landen der Heydenen, dat sy de goeden der volcken in namen.

* Psal. 111.b.6.

45

Op dat si houden souden zijn Rechten, ende zijn Wetten bewaren, Haleluia.