Den Bibel, Inhoudende dat Oude ende Nieuwe Testament (Biestkensbijbel)

¶ Den .Ciiij. Psalm.

1

⁺LOoft^† den HEERE mijn siele, HEEre mijn Godt, ghy zijt seer heerlijck, Ghy zijt schoon ende wtermaten verchiert.

+ A vers 1

† Psal. 104.d.35. 146.a.1.

2

^* Licht is dijn cleet, dat ghy aen hebt:^† Ghy breydet den Hemel wt als een Tapeet.

* Gene. 1.a.3.

† Iob. 9.a.8.

3

Ghy weluet bouen met water: Ghy vaert op de wolcken als op eenen wagen,^† ende gaet op de vederen des wints.

† Psal. 18.b.11.

4

^* Ghy die maect uwe Engelen tot winden, ende uwe Dienaers tot vier vlammen.

* Hebr. 1.b.7.

5

^† Ghy die dat Aertrijck fundeert op sinen bodem, dat het blijft altoos ende eewelijck.

† Gene. 1.a.1.

6

Met de diepte bedect ghijt ghelijc met een cleedt, ende wateren staen bouen de berghen.

7

Maer van uwen^† schelden vlieden si, voor uwen donder varen si daer henen.

† Psal. 106.b.9.

8

⁺De bergen gaen hooch voorwaerts, ende de dalen setten haer daer onder, ter steden die ghy haer ghefundeert hebt.

+ B vers 8

9

^† Ghy hebt eenen pael gheset, daer en comen si niet ouer, ende en moeten niet wederom dat Aertrijck bedecken.

† Gene. 1.a.9. Prou. 8.c.29. Iere. 5.d.19.

10

Ghy laet Fonteynen spruyten inde^† Leechten, dat de wateren tusschen de berghen henen vlieten.

† Valleyen.

11

Dat alle dieren op den velde drincken, ende dat wildt sinen dorst blussche.

12

By den seluen sitten de voghelen des hemels, ende singhen onder de tacken.

13

Ghy vochticht de bergen van bouen neder, ghi maect dat Lant vol vruchten, die ghy verleent.

14

^* Ghy laet gras wassen voor dat vee, ende saet tot profijt den menschen, dat ghy broot wt der Aerden brengt.

* Gene. 1.d.29. Psal. 147.b.8

15

^* Ende dat den wijn des menschen herte verhueghe, ende zijn gedaente schoon worde van olie,^† ende dat het broot des menschen herte stercke.

* Eccle. 32.a.7. Prou. 31.a.6.

† Gene. 18.a.5 Iudic. 19.b.5.

16

Dat de boomen des HEEren vol saps staen, de Cederen Libanon, die hy gheplant heeft.

17

Aldaer nestelen de voghelen, ende de Reyghers woonen op de Dennen.

18

⁺De hooghe bergen zijn der^* Gemsen toeulucht, ende de steengaten der Conijnen.

+ C vers 18

* Steenbocken

19

^* Ghy maect de Mane om dat Iaer daer nae te deylen: De Sonne weet haren onderganck.

* Eccle. 43.b.18

20

Ghy maect duysternisse dattet nacht wordt, dan roeren haer alle wilde dieren.

21

De ionge Leeuwen die daer briesscen nae den Roof, ende haer spijse soecken van Godt.

22

Maer wanneer de Sonne opgaet, maken si haer van daer, ende legghen haer in hare cuylen.

23

^* Soo gaet dan de mensche wt tot sinen arbeyt, ende by zijn ackerwerck tot aenden auont.

* Genes. 3.d.17.

24

HEERE hoe zijn uwe wercken soo

[p. 218r]

groot ende vele? Ghy hebtse alle wijsselijck gheordineert, ende de Aerde is vol uwer goeden.

25

De zee die soo groot ende wijdt is, daer wriemelet in sonder ghetal, beyde groot ende cleyne Dieren.

26

⁺Aldaer gaen de Schepen,^† daer zijn Waluisschen, die ghy ghemaect hebt dat si daer inne spelen.

+ D vers 26

† Iob. 41.a.1.

27

Het wacht al op v,^† dat ghy hen spijse gheeft tot zijnder tijt.

† Psal. 136.b.25 Math. 6.c.26

28

Als ghy hen gheeft, so vergaderen si: Als ghy uwe hant op doet, soo worden si met goet versaet.

29

Verbercht ghy v aensicht, so verscricken si: Ghy neemt haren adem wech,^† soo vergaen si, ende worden weder tot stof.

† Gene. 3.d.18.

30

^* Ghy laet wt uwen adem, soo worden si gheschapen, ende vernieut de ghedaente der Aerden.

* Gene. 2.b.7.

31

De eere des HEEren is eewich: De HEEre heeft een welbehaghen aen zijn wercken.

32

Hy siet de Aerde aen,^† so beeft sy: Hy roert de berghen aen, soo roocken si.

† Psal. 18.a.8. 114.a.7. 4.esd. 16.a.12. Iudit. 16.c.18. Iudic. 5.a.2.

33

Ick^* wil den HEEre singhen mijn leefdaghe, ende mijnen Godt louen, soo langhe als ick ben.

* Psalm. 146.a.2.

34

Mijn reden moete hem wel geuallen, ick verhueghe my des HEEren.

35

Der sondaren moet een eynde worden op Aerden, ende de godloosen niet meer zijn:^† Looft den HEERE mijn siele. Haleluia.

† Psal. 104.a.1.