Den Bibel, Inhoudende dat Oude ende Nieuwe Testament (Biestkensbijbel)

¶ Den .Ciij. Psalm.

Eenen Psalm Dauids.

1

⁺LOoft^* den HEERE mijn siele, ende al wat in my is, zijnen heylighen Naem.

+ A vers 1

* Psal. 104.a.1.d.35. 146.a.1. Tob. 13.c.19.

2

Looft den HEERE mijn siele, ende en vergheet niet, wat hy my goets ghedaen heeft.

3

^* Die v alle uwe sonden vergeeft, ende heylt alle uwe ghebreken.

* Psal. 32.a.5.

4

Die v leuen vanden verderuen verlost: Die v croont met ghenade ende bermherticheyt.

5

Die^* uwen mont vrolijcken maeckt, ende dat ghy weder ionck wordt, als een Arent.

* Iob. 33.c.25.

6

De HEEre doet gherechticheyt ende gherichte, allen die onrecht lijden.

7

Hy heeft sine wegen Mosi laten weten, de kinderen Israels zijn doen.

8

^* Bermhertich ende ghenadich is de HEERE, verduldich ende van grooter goetheyt.

* Exod. 34.a.6 Psal. 86.c.15. 2.Esd. 9.c.17.

9

Hy en sal niet altoos kijuen, noch eewelijck, toorne behouden.

10

⁺Hy en handelt niet met ons nae onse sonden, ende en verghelt ons niet na onser misdaet.

+ B vers 10

11

^* Want so hooghe den Hemel bouen de Aerde is, laet hy sine ghenade geworden ouer de ghene die hem vreesen.

* Psal. 57.b.11. 108.a.5.

12

So verre dat Oosten is vanden Westen, laet hi onse ouertredinge van ons zijn.

13

Ghelijck hem een vader ouer de kinderen ontfermt, so ontfermt hem de HEEre ouer die, die hem vreesen.

14

^* Want hy kent wat wy voor een werck zijn, hy ghedenct daer aen dat wy stof zijn.

* Psal. 78.d.39.

15

^† Een mensche is in zijn leuen ghelijc gras, hy bloeyt gelijc een bloeme opt velt.

† Psal. 90.a.6. Esaie. 40.a.6 Iaco. 1.b.10. 1.Pet. 1.d.24. Eccle. 14.b.15

16

Wanneer den wint daer ouer gaet, so en is si niet meer daer, ende haer stede en kentse niet meer.

17

^+* Maer de ghenade des HEEren duert van eewicheyt tot eewicheyt, ouer de ghene die hem vreesen, Ende zijn gherechticheyt op kints kinde.

+ C vers 17

* Psalm. 102.d.27.

18

By den ghenen die zijn verbont houden, ende ghedencken aen zijn gheboden,^* dat si daer nae doen.

* Deut. 6.a.1.

19

De HEERE heeft sinen stoel inden hemel bereyt: Ende zijn Rijcke heerschet ouer alle dinck.

20

^† Looft den HEERE ghy zijn Enghelen, ghy stercke Helden, die zijn beuel wtrecht, datmen hoore de stemme zijns woorts.

† Psal. 148.a.2.

21

Looft den HEEre alle zijn heyrscha-ren, zijn Dienaren, ghy die zijnen wille doet.

22

Looft den HEEre alle zijn wercken aen alle hoecken zijnre heerschappijen:^* Looft den HEEre mijn siele.

* Psal. 104.a.1. 146.a.1.