Den Bibel, Inhoudende dat Oude ende Nieuwe Testament (Biestkensbijbel)

¶ Den .Cij. Psalm.

1

Een ghebet des ellendighen, wanneer hy bedroeft is, ende zijn clage voor den HEEre wtghiet.

2

⁺HEEre,^† hoort mijn ghebet, ende latet mijn roepen tot v comen.

+ A vers 2

† Psal. 143.a.1.

3

En verbercht v aensicht niet voor my, inder noot,^* neyget uwe ooren tot my: Wanneer ick v aenroepe, so verhoort my haestelijck.

* Psal. 86.a.1. 88.a.3. Tren. 3.e.57.

4

^† Want mijn dagen zijn vergaen gelijck eenen roock: Ende mijn ghebeenten zijn verbrant ghelijck eenen brant.

† Psal. 68.a.3 Sap. 5.c.15.

5

Mijn herte is gheslaghen, ende verdorret ghelijck gras, dat ick oock vergete mijn broot te eten.

6

^* Mijn ghebeente cleeft aen mijn vleesch, van huylen ende suchten.

* Tren. 4.b.8.

7

Ick ben gelijc als eenen^* Roerdomp inder woestijnen: Ic ben gelijc als eenen steenwl inde verstoorde steden.

* Pellicaen.

8

Ick wake, ende ben ghelijc een eensame voghel op den dake.

9

⁺Daghelijcx scheynden my mijn vianden, ende die my bespotten, sweeren by my.

+ B vers 9

10

Want ick ete asschen als broot, ende menghe mijnen dranck met weenen.

11

Voor uwen dreyghen ende thoorne, dat ghy my opgheheuen ende te gronde ghestooten hebt.

12

Mijn^† daghen zijn vergaen ghelijck een schaduwe, ende ick verdorre ghelijck gras.

† Iob. 8.a.9. 14.a.1. Psal. 109.c.23. 144.a.4. 1.Par. 30.c.15. Sapi. 2.b.9.

13

Maer ghy HEEre blijft eewelijck, ende uwe gedachtenisse voort ende voort.

14

Ghy, wilt v doch op maken, ende ouer Sion ontfermen, want het is tijt dat ghy haer ghenadich zijt,^† ende de vre is ghecomen.

† Iere. 25.b.12. 29.b.10.

15

^* Want uwe knechten wouden geerne, dat si ghebouwet werde, ende saghen gheerne, dat haer steenen ende kalck ghereet ghemaect worde.

* 1.Esd. 1.a.1.6.7.

16

Dat de Heydenen uwen Naem vreesen, ende alle Coninghen op Aerden, uwe eere.

17

⁺Dat de HEEre Sion bout, ende verschijnt in zijn eere.

+ C vers 17

18

Hy keert hem tot het ghebet der verlatenen, ende en versmaet haer ghebet niet.

19

Dat worde ghescreuen op de nacomelinghen, ende dat volck dat gheschapen sal worden, sal den HEEre louen.

20

Want hy aenschout van zijnder heyligher hoocheydt, ende de HEERE siet vanden Hemel op Aerden.

21

Dat hy dat suchten des geuangenen hoore, ende los make de kinderen des doots.

22

Op dat sy te Sion predycken den Naem des HEEREN, ende zijn lof te Ierusalem.

23

Wanneer de volcken te samen comen, ende de Conincrijcken, om den HEEre te dienen.

24

⁺Hy verootmoedicht op den wech mijne cracht, hy vercort mijn daghen.

+ D vers 24

25

Ick segghe mijn Godt, en neemt my niet wech in de helft mijnder daghen.

[p. 217v]

24[26]

Vwe iaren dueren voort ende voort,^† ghy hebt te voren de Aerde ghefundeert, ende de Hemelen zijn uwer handen werck.

† Hebre. 1.c.10.

25[27]

^† Sy sullen vergaen, maer ghy blijft, si sullen alle verouden, ghelijck een laken. Sy worden verandert als een cleet, wanneer ghyse veranderen sult.

† Esaie. 51.a.6. Mat. 24.c.35. 2.Pet. 3.b.10. Hebre. 1.c.11.

26[28]

Maer ghy blijft ghelijck ghy zijt, ende uwe Iaren en nemen gheen eynde.

27[29]

^* De kinderen uwer knechten sullen blijuen, ende haer saet sal voor v ghedijen.

* Psal. 103.c.17.