Den Bibel, Inhoudende dat Oude ende Nieuwe Testament (Biestkensbijbel)

¶ Den .xcj. Psalm.

1

⁺VVie onder der bescherminghe des hoochsten sit, ende onder de schaduwe des Almachtighen blijft.

+ A vers 1

2

Die spreeckt tot den HEEre:^† Mijn toeuerlaet ende mijn Borcht, mijn God, op dien ick hope.

† Psalm. 18.a.3

3

Want hy verlost my vanden strick des Iaghers, ende vander schadelijcker Pestilentie.

4

^* Hy sal v met sinen vederen bedecken, ende uwe toeuerlaet sal zijn onder zijn vlogelen, Sine waerheyt is scherm ende schilt.

* Psal. 121.a.4.

5

^* Dat ghy niet verschricken en moet voor den grouwel des nachts,^† voor de pijlen die des daechs vlieghen.

* Iob. 5.c.21.

† Ephe. 6.c.16

[p. 216r]

6

Voor de Pestilencie, die int duyster sluypt: Voor de sicte, die inden middach verderft.

7

Ofter duysent vallen aen uwer zijden, ende thien duysent tot uwer rechter hant, soo en salt doch v niet treffen.

8

⁺Ia ghy sult met uwen ooghen uwen lust sien: Ende aenschouwen, hoet den godloosen vergouden wort.

+ B vers 8

9

^* Want de HEEre is dijne toeuerlaet: De Hoochste is dijne toeulucht.

* Psal. 18.b.19. Eccle. 34.c.16 Prou. 3.c.25.

10

V en sal gheen quaet ghemoeten, ende gheen plaghe en sal tot uwer Hutten ghenaken.

11

^† Want hy heeft sinen Enghelen beuolen van dy, dat si v behoeden op alle uwe weghen.

† Mat. 4.a.6. Luce. 4.a.10. Exod. 23.c.20. Psal. 34.a.8.

12

Dat si v op de handen dragen, ende ghy uwen voet niet aen eenen steen en stoot.

13

^* Op de Leeuwen ende Aderen suldy gaen, ende treden op de Ionge Leeuwen ende Draken.

* Luce. 10.b.19.

14

Hy begheert mijns, so wil ic hem wt helpen: Hy kent mijnen Naem, daerom wil ick hem beschudden.

15

^* Hy roept my aen, so wil ic hem verhooren, ick ben by hem inder noot, ic wil hem daer wt trecken, ende tot eeren maken.

* Psalm. 4.a.1. 50.b.15. 120.a.1.

16

Ick wil hem versaden met langhen leuen, ende wil hem Toonen mijn Heyl.