Den Bibel, Inhoudende dat Oude ende Nieuwe Testament (Biestkensbijbel)

¶ Den .xcij. Psalm.

1

Een Psalm liet op den Sabbath dach.

2

⁺DAt is een costelijc^† dinc den HEEre dancken, ende Lof singen uwen Naem, ghy Hoochste.

+ A vers 2

† Hebre. 13.c.15.

3

Des Morghens uwe ghenade, ende des nachts uwe waerheyt vercondigen.

4

Op de thien snaren ende Psalter, met spelen op der Herpen.

5

^† Want HEEre ghy laet my vrolijc singhen van uwe wercken. Ende ic roeme de gheschiedenissen uwer handen.

† Roma. 1.b.19 Sapi. 13.a.1.

6

^* HEEre, hoe zijn dijne wercken so groot? Vwe gedachten zijn so seer diepe.

* Psal. 111.a.2.

7

Een dwaesachtich en gelooft dat niet, ende een Narre en achtet sulcx niet.

8

^† De Godloosen groenen gelijck dat gras, ende de quaetdoenders bloeyen alle, tot dat si verdaen worden altoos ende eewelijck.

† Psal. 73.a.2.

9

Maer ghy HEEre zijt de Hoochste, ende blijft eewelijck.

10

^+† Want siet, uwe Vianden, HEEre siet, uwe Vianden sullen vergaen, ende alle quaetdoenders moeten verstroydt worden.

+ B vers 10

† Psal. 37.c.20.

11

Maer mijnen horen sal verhoocht worden,^† ghelijck eens Eenhorens, ende worde ghesalft met verscher olien.

† Num. 23.d.22 24.b.8. Iob. 39.b.12.

12

Ende mijn ooghe sal sinen lust sien aen mijne vianden, ende mijn oore sal sinen lust hooren aen de boosachtighe, die haer teghen my setten.

13

De gherechtighe sal groenen ghelijck eenen palmboom, hy sal wassen ghelijck eenen Ceder in Libanon.

14

Die^† gheplant zijn in dat huys des HEEren, sullen in de voorhouen ons Godts groenen.

† Roma. 11.c.17

15

Ende al worden si ooc out, so sullen si nochtans bloeyen, vruchtbaer ende versch zijn.

16

Dat si vercondighen, dat de HEEre soo vroom is, mijnen troost, ende gheen onrecht en is aen hem.