Den Bibel, Inhoudende dat Oude ende Nieuwe Testament (Biestkensbijbel)

¶ Den .lxxxix. Psalm.

1

Een onderwijsinghe Ethan, des Esrahiten.

2

⁺ICk wil singhen vander Ghenade des HEEren eewelijc, ende sine waerheyt vercondigen met mijnen Monde voort ende voort.

+ A vers 2

3

Ende segghe alsoo: Dat een eewighe ghenade sal opgaen, Ende ghy sult dijne waerheydt trouwelijck houden inden Hemel.

4

^* Ick heb een verbont ghemaect met mijnen wtuercoren: Ic hebbe Dauid mijnen knecht ghesworen.

* 2.Reg. 7.c.12. Psal. 132.b.11.

5

Ick wil dy eewelijck saet bereyden, ende uwen stoel bouwen, voort ende voort. Sela.

6

^* Ende de Hemelen sullen HEEre uwe wonderen prijsen, ende uwe waerheyt inde ghemeynte der heylighen.

* Psal. 19.a.1. 50.a.5. 97.a.6

7

Want wie mach inde Wolcken den HEEre gelijck worden?^† Ende ghelijck zijn, onder de kinderen der Goden, den HEEre?

† Psal. 86.b.8.

8

Godt is seer machtich inde vergaderinghe der heylighen, ende wonderbaerlijck ouer alle die rontom hem zijn.

9

⁺HEEre Godt Sebaoth, wie is ghelijck ghy, een machtich Godt? Ende uwe waerheyt is rontom v.

+ B vers 9

10

^* Ghy hebt heerscappije ouer de stuere zee, ghy stilt haer Wallen, als si haer opheffen.

* Exod. 14.e.21 Iob. 26.b.12. Psal. 107.d.29 Esaie. 51.c.15. Mat. 8.c.26.

11

Ghy slaet Rahab doot, ghy verstroyt uwe Vianden, met uwen stercken Arm.

12

^† Hemel ende Aerde is uwe, ghy hebt den Aertbodem ghefondeert, ende wat daer in is.

† Psal. 24.a.1 50.a.12. Exod. 19.a.1. 1.Cor. 10.c.26. Deut. 10.c.14 1.Regum. 2.b.8 Iere. 27.a.5.

13

Noorden ende Suyden hebdy gheschapen: Thabor ende Hermon iuychen in uwen naem.

14

Ghy hebt eenen gheweldigen Arm, sterck is uwe hant, ende hooghe is uwe rechte hant.

15

Gherechticheydt ende Gherichte is dijns stoels beuestinghe: Ghenade ende waerheyt zijn voor dijnen aensichte.

16

Wel den volcke dat iuychen can: HEEre si sullen int Licht ws aensichts wandelen.

17

⁺Sy sullen ouer uwen Naem daghelijcx vrolijck zijn, ende in dijner gherechticheyt heerlijck zijn.

+ C vers 17

18

Want ghy zijt den roem haerder stercheyt: Ende door dijne ghenade suldy onsen Hoorne verhooghen.

19

Want de HEEre is onsen schilt,^† ende de heylighe in Israel is onsen Coninck.

† Esaie. 1.a.4. Abac. 1.c.12.

20

Op dat mael, spraect ghy int gesichte tot uwen heylighen, ende seyt: Ick hebbe eenen Helt verweckt die helpen sal: Ick hebbe verhooghet eenen wtghecorenen wt den Volcke.

21

^* Ick hebbe vonden mijnen knecht Dauid: Ick hebbe hem ghesalft met mijn heylighe Olie.

* 1.Reg. 16.a.1. 2.Reg. 5.a.2. Act. 13.b.22.

22

Mijn hant sal hem behouden, ende mijnen arm sal hem stercken.

23

De Vianden en sullen hem niet ouerweldighen, ende de ongherechtighe en sullen hem niet dempen.

24

Maer ick wil zijn Wedersegghers slaen voor hem henen: Ende die hem haten wil ick plaghen.

25

^* Maer mijne waerheyt ende ghenade sal by hem zijn: Ende sinen Horen sal in mijnen naem verheuen worden.

* 2.Reg. 5.a.2.

26

^+† Ick wil zijn hant inde zee setten, ende zijn rechter hant inde wateren.

+ D vers 26

† 2.Regum. 8.

27

Hy sal mi noemen also: Ghy zijt mijn Vader, mijn Godt, ende troost, die my helpet.

[p. 215v]

28

Ende ick wil hem tot eenen eersten sone maken, Alderhoochste onder de Coninghen op Aerden.

29

Ick wil hem eewelijck houden mijne ghenade, ende mijn verbont sal hem vaste blijuen.

30

Ick wil hem eewelijck saet gheuen, ende sinen stoel (soo langhe als den Hemel duert) behouden.

31

^† Maer soo zijn kinderen mijn Wet verlaten, ende in mijn Rechten niet en wandelen.

† 2.Reg. 7.c.14 3.Reg. 9.b.6.

32

So si mijn ordinancien ontheyligen, ende mijn gheboden niet en houden.

33

Soo wil ick hare Sonden met der Roeden besoecken, ende haer misdaet met plaghen.

34

Maer mijne ghenade en wil ick niet van hem wenden, ende mijne waerheyt niet laten faelgieren.

35

Ick en wil mijn verbont niet ontheylighen, ende niet veranderen wat wt mijnen monde ghegaen is.

36

⁺Ick hebben eens ghesworen by mijner heylicheydt: Ick en wil Dauid niet lieghen.

+ E vers 36

37

Sijn saet sal eewich zijn,^† ende sinen Stoel voor my ghelijck de Sonne.

† Psal. 72.a.5.

38

Als de Mane sal hy eewelijck behouden zijn, Ende ghelijck als de ghetuyghe inde Wolcken ghewis zijn. Sela.

39

Maer nv verstoot ghy ende verworpt, ende vertorent met uwen ghesalfden.

40

Ghy verstoort dat verbondt ws knechts, ende treedt zijn Croone aen de aerde.

41

^* Ghy breeckt in stucken alle zijn Mueren, ende laet sine Vesten verscueren.

* Psal. 80.b.13.

42

Hem beroouen alle die voorby gaen, hy is zijnen Naebueren eenen spot gheworden.

43

Ghy verhoocht de rechter hant zijnder wederspannige, ende verhuecht alle sine Vianden.

44

Oock hebdy de cracht zijns sweerts wechgenomen, ende en laet hem niet verwinnen inden strijdt.

45

Ghy verstoort zijn reynicheydt, ende worpt sinen stoel ter Aerden.

46

⁺Ghy vercort den tijt zijnder ioncheyt, ende bedect hem met schimp. Sela.

+ F vers 46

47

HEEre,^* hoe lange wildy v so heel verberghen, ende uwe gramschappe ghelijck vier laten bernen.

* Psalm. 44.c.24.

48

Ghedenct hoe cort dat mijn leuen is: Waerom wildy alle Menschen om niet gheschapen hebben?

49

^* Waer is yemant die daer leeft, ende den doot niet en siet? Die zijn siele verlosse wt der Hellen hant? Sela.

* Gene. 3.d.19. Eccle. 9.b.5. Hebre. 9.d.27

50

HEERE, waer is dijne voorledene ghenade? Die ghy Dauid gesworen hebt in uwe waerheyt.

51

Ghedenct HEEre aen de versmaetheyt dijner knechten, die ick draghe in mijnen schoot, van alsoo veel Volcken.

52

Daermede v HEEre uwe Vianden scheynden, daermede si sceynden de voetstappen ws Ghesalfden.

53

Ghelooft sy de HEERE eewelijck. Amen. Amen.