Den Bibel, Inhoudende dat Oude ende Nieuwe Testament (Biestkensbijbel)

¶ Den .lxxxviij. Psalm.

1

Een Psalm Liet der kinderen Korah, voor te singen vander swacheyt der ellenden. Een onderwijsinge Hemans des Esrahiten.

2

⁺HEEre Godt mijn Heylant, ic roepe dach ende nacht voor v.

+ A vers 2

3

Laet mijn gebet voor v comen,^* neyghet dijne ooren tot mijn roepen.

* Tren. 3.e.57. Psal. 86.a.1.

4

Want mijn siele is vol Iammers, ende mijn leuen is nae by der Hellen.

5

Ick ben gheacht ghelijck de ghene die ter Hellen varen: Ick ben ghelijck een man die gheen hulpe en heeft.

6

Ick ligge onder de dooden verlaten, ghelijck de verslaghen die inde grauen ligghen, dier ghy niet meer en ghedenct, ende sy van dijner handt^† afghesondert zijn.

† Afgesceyden.

7

Ghy hebt my inden Cuyle onderwaerts gheleyt, in duysternissen ende in de diepte.

8

Dijne gramschap druct my, ende dringt my met alle dijne vloeden. Sela.

9

^+* Mijn vrienden hebdy verre van my ghedaen: Ghy hebt my hen tot eenen grouwel ghemaect: Ick ligghe geuangen ende en can niet wtcomen.

+ B vers 9

* Psal. 69.b.9. 38.b.12. Iob. 19.b.14.

10

Mijn ghedaente is iammerlijck van ellende, HEEre ick roepe v daghelijcks aen: Ick breyde mijn handen wt tot v.

11

Suldy dan onder den dooden wonder doen? Oft sullen de verstoruen opstaen ende v dancken? Sela.

12

^† Salmen inde grauen vertellen uwe goetheyt? Ende dijne trouwe int verderuen?

† Psa. 6.a.6. 30 b.10. 115.b.17. Esaie. 38.d.18

13

Moghen dan uwe wonderen inder duysternissen bekent worden? Oft uwe gherechticheyt int Lant, daermen niet en ghedenct?

14

Maer ick roepe tot v HEEre, ende mijn ghebet coemt vroech voor dy.

15

Waerom verstoot ghy HEEre mijn siele? Ende verbercht uwe Aensicht voor my?

16

Ick ben ellendich ende onmachtich, dat ick soo verstooten ben, ick lijde verschricken, dat ick schier versaghe.

17

Dijne gramscappe gaet ouer my: Dijne verschricken druct my.

18

Sy omgheuen my daghelijcx ghelijck water: Ende omringhen my met malcanderen.

19

Ghy maeckt, dat mijn Vrienden ende naesten, ende mijne Maghen, hen verre van my doen, om sulcker ellenden wille.