Den Bibel, Inhoudende dat Oude ende Nieuwe Testament (Biestkensbijbel)

¶ Den .lxxxv. Psalm.

1

Eenen Psalm der kinderen Korah, voor te singhen.

2

⁺HEEre, ghy die voormaels zijt ghenadich gheweest uwen Lande, ende hebt de gheuanghen Iacobs verlost.

+ A vers 2

3

^* Ghy die de misdaet voormaels vergheuen hebt dijnen volcke, ende alle haer sonden bedect. Sela.

* Psalm. 32.a.1.

4

Ghy die voormaels alle uwen toorne hebt wech ghenomen, ende v gheweynt van de gramschap ws toorns.

5

Troost ons, God onse Heylant, ende laet af van dijner onghenade ouer ons.

6

^* Wildy dan eewelijc ouer ons toornen? Ende uwen toorne laten gaen, altoos voort ende voort?

* Psal. 79.a.5. Esai. 64.d.22

7

Wildy ons dan niet weder verquicken? Dat hem dijn volck ouer v verhueghen mach.

8

HEEre toont ons dijne ghenade, ende helpt ons.

9

⁺Och dat ick hooren mochte, dat Godt de HEEre spreect, Dat hy vrede toeseyde sinen volcke ende sinen heylighen, op dat si niet op een dwaesheyt en comen.

+ B vers 9

10

Doch is ymmers zijn hulpe dien nae, die hem vreesen, dat in onsen lande eere woone.

11

Dat goedertierenheydt ende trouwe haer onder malcanderen ontmoeten, gherechticheyt ende vrede hen cussen.

12

Dat trouwe op Aerden wasse, ende gerechticheyt vanden Hemel mercke.

13

Dat ons oock de HEEre goet doe, op dat onse Lant sine vruchten gheue.

14

Dat nochtans gherechticheydt voor hem blijue, ende int werck gae.