Den Bibel, Inhoudende dat Oude ende Nieuwe Testament (Biestkensbijbel)

¶ Den .lxxxiiij. Psalm.

1

Eenen Psalm der kinderen Korah, op der Githith, voor te singhen.

2

⁺HOe lieffelijc zijn uwe Wooningen HEEre Sebaoth.

+ A vers 2

3

Mijn siele verlangt, ende suchtet na

[p. 214v]

de voorhouen des HEEren:^* Mijn Lijf ende Siele verhuegen haer inden leuendighen Godt.

* 2.Cor. 5.a.2. Canti. 5.c.6.

4

Want de Voghel heeft een huys geuonden, ende de Swaluwe haren Nest, daer si haer Ionghen in leyt, te weten, uwe Altaren HEEre Sebaoth, mijn Coninck ende mijn Godt.

5

Wel den ghenen, die in uwen huyse woonen, die louen v alle tijt. Sela.

6

Wel den mensche, die v voor haer sterckheyt houden, ende v van herten na wandelen.

7

Die door dat iammer dal gaen, ende maken aldaer Fonteynen, ende de Leeraers worden met veel seeghens verchiert.

8

⁺Sy behouden deene ouerwinninghe nae de andere, datmen sien moet, de rechte Godt sy te Sion.

+ B vers 8

9

HEEre Godt Sebaoth hoort mijn ghebet: Verneemtet God Iacobs. Sela.

10

God onsen schilt, scouwet doch, Siet aen dat rijcke dijns Ghesalfden.

11

Want eenen dach in uwe voorhouen is beter, dan anders duysent: Ick wil lieuer de duere wachten in mijns Godts huys, dan lange woonen inder Godlooser Hutten.

12

Want God de HEEre is de Sonne ende schilt: De HEEre gheeft ghenade ende eere: Den vroomen^* en sal hy gheen goet laten ghebreck hebben.

* Psal. 34.b.10

13

HEERE Sebaoth,^† wel den mensche, die hem op v verlaet.

† Psalm. 2.b.12 Iere. 17.b 7. Prou. 16.c.20