Den Bibel, Inhoudende dat Oude ende Nieuwe Testament (Biestkensbijbel)

¶ Den .lxxxvj. Psalm.

Een ghebet Dauids.

1

⁺HEEre^* neyghet uwe ooren, ende verhoort my: Want ic ben ellendich ende arm.

+ A vers 1

* Psal. 88.a.3. Tren. 3.e.57.

2

Bewaert mijn siele, want ic ben heylich: Helpt ghy mijn God uwen knecht, die hem op v verlaet.

3

HEEre zijt my ghenadich: Want ick roepe daghelijcx tot v.

4

Verhuecht de siele ws knechts: Want nae v HEEre verlangt my.

5

^* Want ghy HEEre zijt goet ende ghenadich, van grooter goetheydt, allen die v aenroepen.

* Ioel. 2.c.13. Ione. 4.a.2. Psal. 103.a.8. 145.a.8.

6

Verneemt HEEre mijn ghebet, ende merct op de stemme mijns smeeckens.

7

Inder noot roepe ick v aen, wilt my doch verhooren.

8

^+† HEEre v is niemandt ghelijck onder den Goden: Ende daer en is niemant die doen can ghelijck ghy.

+ B vers 8

† Psal. 89.a.7.

9

Alle Heydenen die ghy ghemaeckt hebt sullen comen, ende voor v aenbidden HEEre, ende uwen Naem eeren.

10

Dat ghy soo groot zijt, ende wonder doet, ende alleen Godt zijt.

11

^† Wijst my HEEre uwen wech, dat ick wandele in uwer waerheyt, behoudt mijn herte byden Eenigen, dat ick dijnen Naem vreese.

† Psal. 25.a.4.

12

Ick danck v HEEre mijn God van heelder herten: Ende loue uwen Naem eewelijck.

13

Want uwe goetheydt is groot ouer my:^† Ende ghy hebt mijn siele verlost wt der dieper Hellen.

† Psal. 30.a.4.

14

⁺Godt, de stoute setten haer tegen my, ende den hoop der Tyrannen staet my na mijn siele, ende en hebben v niet voor ooghen.

+ C vers 14

15

^* Maer ghy HEEre God zijt barmhertich ende ghenadich, verduldich ende van grooter goetheyt ende trouwe.

* Exod. 34.a.6 Psal. 103.a.8. 145.a.8. Iohel. 2.c.13. Ionas. 4.a.2

16

Keert v tot my, zijt my ghenadich, sterckt dijnen knecht met dijner macht, ende helpt^† den sone uwer Maerten.

† Ps. 116.c.16.

17

Doet een teecken aen my, dattet my wel gae: Dattet sien die my haten, ende haer schamen moeten, dat ghy my bystaet, HEEre, ende troost my.