Den Bibel, Inhoudende dat Oude ende Nieuwe Testament (Biestkensbijbel)

¶ Den .lxxxj. Psalm.

1

Op der Githith, voor te singhen, Assaphs.

2

⁺SIngt vrolijcken Gode, die onse stercheyt is: Iuychet, den Gode Iacobs.

+ A vers 2

3

Neemt de Psalmen, ende gheeft herwaerts de Trommelen, lieffelijcke Herpen met Psalters.

4

Blaest inde nieuwe Mane de Trompetten, in onse Feesten der^† Loouerhutten.

† Leuit. 23.f.34

5

^* Want dat is een zede in Israel, ende een recht des Godts Iacobs.

* Num. 10.a.1.

6

Sulcx heeft hy tot een ghetuychenis geset onder Ioseph, doen si wt Egipten lant trocken, ende vreemde sprake ghehoort hadden.

7

Ende by hare schouderen vanden last ontslaghen hadde, ende hare handen der potten los werden.

8

^† Doen ghy my inder noot aenriept, hielp ick v wt: Ende verhoorde v, doen v dat weder ouer viel:^† Ende versocht v aent kijfwater. Sela.

† Exod. 3.b.7.

† Exod. 17.a.2.

9

⁺Hoort mijn volck, ic wil onder v ghetuyghen, Israel ghy sult my hooren.

+ B vers 9

10

Dat onder v gheen ander Godt en sy, ende dat ghy gheenen vreemden God en aenbidt.

11

^* Ick ben de HEEre uwe God, die v wt Egipten lant geleyt heeft: Doet uwen mont wijde open, laet my hem vullen.

* Exod. 20.a.1. Deut. 5.a.6.

12

^† Maer mijn volck en hoorde mijn stemme niet, ende Israel en wil mijns niet.

† Prou. 1.b.24. Roma. 1.d.28.

13

So hebbe ickse ghelaten in haers herten goet duncken, dat si wandelen nae haren Raet.

14

Wilde mijn volck my ghehoorsaem zijn, ende Israel op mijn weghen gaen.

15

Soo wilde ick haer Vianden haest^† dempen, ende mijn hant ouer haer wederpartijers weynden.

† Temmen.

16

Ende die den HEEre haten, moesten aen hem faelgeren, maer haren tijt soude eewelijck dueren.

17

Ende ick soudese met de beste tarwe spijsen, ende^* met Honich wt den steenen, versaden.

* Deut. 32.b.13.