Den Bibel, Inhoudende dat Oude ende Nieuwe Testament (Biestkensbijbel)

¶ Den .lxxix. Psalm.

Eenen Psalm Assaphs.

1

⁺HEEre,^* Heydenen zijn in dijn Erue gheuallen, die hebben uwen heylighen tempel veronreynicht,^* ende van Ierusalem steenhoopen ghemaect.

+ A vers 1

* 2.Par. 36.c.17

* Hier. 9.b.11.

2

^† Sy hebben de lichamen uwer knechten den Voghelen onder den Hemel te verslinden ghegheuen, ende dat vleesch uwer Heylighen den dieren inden lande.

† Iere. 15.a.3. 16.a.4. 34.d.18. Deut. 28.c.26.

3

^* Sy hebben bloet vergoten rontom Ierusalem ghelijck water, ende daer en was niemant die begroef.

* 1.mac. 7.b.17.

4

^† Wy zijn onsen naebueren een ver-smaetheyt worden, eenen spot ende schimp den ghenen die rontom ons zijn.

† Psal. 31.b.12 44.b.14. Iere. 20.b.7. 3.Reg. 9.b.7.

5

^* HEEre, hoe langhe wildy so heel vertoornen? Ende dijnen ijuer ghelijck vier laten bernen?

* Esaie. 64.d.22. Iere. 10.d.25.

6

^† Schudt v gramschap op de Heydenen, die v niet en kennen, ende op de Conincrijcken die uwen Naem niet aen en roepen.

† Esaie. 64.d.23.

7

Want si hebben Iacob verslonden, ende zijn huysen verwoest.

8

⁺En ghedenct niet onse voorleden misdaet: Ontfermt v onser haestelijck, want wy zijn seer dunne gheworden.

+ B vers 8

9

Helpt ghy ons God onse Helper, om ws Naems eere wille: Verlost ons, ende vergheeft ons onse sonden om ws Naems wille.

10

Waerom laet ghy de Heydenen segghen:^† Waer is nv haer Godt? Laet onder de Heydenen voor onse oogen condt worden de wrake des bloets uwer knechten, dat vergoten is.

† Psal. 42.a.4 155.a.2.

11

Laet voor v comen dat suchten der gheuanghenen: Na uwen grooten arm, behout de kinderen des doots.

12

Ende verghelt onsen nabueren seuenuuldich in haren schoot, haren smaet, daermede si v HEEre ghescheynt hebben.

13

^* Maer wy uwe Volck ende Schapen uwer weyden, dancken v eewelijck: Ende vercondighen uwen roem voort ende voort.

* Psal. 95.b.7. 100.a.3.