Den Bibel, Inhoudende dat Oude ende Nieuwe Testament (Biestkensbijbel)

¶ Den .lxxiij. Psalm.

Eenen Psalm Assaph.

1

⁺ISrael heeft nochtans Godt tot eenen troost^† wie slechs van reynen herten is.

+ A vers 1

† Psal. 24.a.4. Matt. 5.a.8.

2

^* Maer ick hadde schier ghestruykelt met mijnen voeten: Mijne treden hadden by na gheslippert.

* Iob. 21.a.7. Ierem. 12.a.1. Abac. 1.c.13. Malac. 3.c.15.

3

Want het verdroot my op de grootsprekers, doen ick sach, dattet den godloosen so wel ghinck.

4

Want sy en zijn in gheen perijkel des doots, Maer staen vast gelijc een palleys.

5

Sy en zijn niet in ongheluck ghelijck ander lieden, ende en worden niet als andere menschen gheplaecht.

6

Daerom moet haer^† trotsen costelijck dinck zijn, ende haer vermetenheyt moet wel ghedaen heeten.

† Pocchen.

7

Haren persoon bruystet haer als een vet buyc, sy doen wat sy slechs dencken.

8

⁺Sy vernieten alle dinck, ende spreken quaet daer af, ende spreken ende lasteren hooch her in.

+ B vers 8

9

Wat sy spreken, dat moet vanden Hemel af ghesproken zijn, Wat sy segghen, dat moet gelden op Aerden.

10

Daerom valt hen haer ghemeyn volc toe, ende loopen hen toe met hoopen als water.

11

^† Ende spreken: Wat soude Godt na genen vragen, wat soude de Hoochste haerder achten?

† Psal. 10.b.11. 94.a.7.

12

Siet, dat zijn de godloosen, die zijn geluckich inder werelt, ende worden rijcke.

13

^* Sal het dan te vergeefs zijn, dat mijn herte onstraffelijck leuet, ende ick mijn handen in onschult wassche?

* Malac. 3.c.14

14

Ende ben geplaecht daghelijcx, ende mijn straffe is alle morghen voorhanden?

15

⁺Ick hadde oock schier also geseyt, als sy, Maer, siet daermede hadde ic verdoemt alle uwe kinderen, die oyt gheweest zijn.

+ C vers 15

16

Ic dacht daer na, dat icket begrijpen mochte, maer het was my te swaer.

17

Tot dat ick ghinc in dat heylichdom Gods, ende mercte op haer eynde.

18

Maer ghi setse op dat glatte, ende^† stortse te gronde.

† Worpse.

19

^* Hoe worden sy so haest te niet, sy gaen onder ende nemen een eynde met verschricken.

* Psal. 37.b.10.e.35.

20

^† Ghelijck eenen droom, wanneer een ontwect, so maect ghi HEEre haer beelt inde Stadt versmaet.

† Psal. 90.a.5. Esaie. 29.b.7. Iob. 20.a.8.

21

Maer het doet my wee int herte, ende steect my in mijn Nieren.

22

Dat ick moet eenen Sot zijn, ende niet weten, ende moet als een dier zijn voor v.

23

Nochtans blijf ic alleneen by v, want ghy hout my by mijnder rechter hant.

24

Ghy leyt my na uwen raet, ende neemt my eyndelijck met eeren aen.

25

Wanneer ick slechs v hebbe, so en vraghe ick niet na Hemel ende Aerde.

26

Al waert dat my ooc Lijf ende siele versmachtede, soo zijt ghy doch Godt altijt mijns herten troost^† ende mijn deel.

† Nu. 18.c.20. Psal. 119.h.57 16.a.6. Tren. 3.c.24.

27

^† Want siet, die van v wijcken sullen vergaen: Ghy vernielt alle die, die tegen v hoererye bedrijuen.

† Iere. 17.b.13. Hebr. 10.f.38.

28

Maer dat is mijn vruechde, dat ic my tot Godt houde, ende mijn toeuerlaet sette op den HEEre, HEEre, dat ick vercondighe alle dijn doen.