Den Bibel, Inhoudende dat Oude ende Nieuwe Testament (Biestkensbijbel)

¶ Den .lxxij. Psalm.

Des Salomons.

1

⁺GOdt gheeft uwe gherichte den Coninck, ende uwe gherechticheit des Coninx Sone.

+ A vers 1

2

^† Dat hy dijn volck brenghe totter gerechticheyt, ende uwe ellendige verlosse.

† Deut. 17.d.23.

3

Laet de Berghen den vrede brengen onder dat Volck, ende de cleyne berghen de gherechticheyt.

4

Hy sal dat allendich Volck by Rechte behouden, ende den armen helpen, ende de Lasteraers in stucken smijten.

5

Men sal v vreesen,^† also lange de Sonne ende de Mane duert, van kinde tot kints kinderen.

† Psal. 89.e.37.

6

Hy sal neder dalen gelijck den regen op dat velt, ghelijck die droppels die dat Lant vochtighen.

7

⁺Tot zijnen tijden sal bloeyen de rechtuaerdighe, ende grooten vrede, tot dat de Mane niet meer en is.

+ B vers 7

8

^† Hy sal heerschappie hebben vander eender zee tot aen de ander, ende vanden water aen, tot des werelts eynde toe.

† Exod. 23.d.31. 3.Reg. 4.b.21 Psal. 80.b.12. Sach. 9.b.10.

9

Voor hem sullen haer neyghen die in de woestijne zijn: Ende zijn vianden sullen stof lecken.

10

De^† Coninghen aende zee ende Insulen, sullen gheschencken brenghen: De Coninghen wt het Rijc Arabien ende Seba, sullen gauen toe voeren.

† 3.Reg. 10.a.1. Esaie. 60.a.6. Matt. 2.b.11.

11

Alle Coningen sullen hem aenbidden: Alle Heydenen sullen hem dienen.

12

Want hy sal den Armen verlossen, die daer crijscht, ende den ellendighen, die gheenen helper en heeft.

13

⁺Hy sal ghenadich zijn den slechten ende armen, ende de sielen der armen sal hi helpen.

+ C vers 13

14

Hy sal haer sielen wt dat bedroch ende onrecht verlossen: Ende haer bloet sal diere gheacht worden voor hem.

15

Hy sal leuen, ende men sal hem geuen vanden goude wt trijc Arabien: Ende men sal alleneen voor hem bidden. Dagelijcx salmen hem louen.

16

Op Aerden bouen op de Berghen sal dat coren dicke staen, zijn vrucht sal beuen ghelijck Libanon, ende sal groenen in de Steden, ghelijck als gras op Aerden.

17

Sijnen Naem sal eewelijck blijuen, so lange de Sonne duert, sal zijnen Naem op de nacomelingen reycken.^* Ende sullen door den seluen geseghent zijn: Alle Heydenen sullen hem prijsen.

* Gene. 12.a.3. 22.c.18.

18

Gheloeft sy Godt de HEERE de Godt Israels^† die alleen wonder doet.

† Iudic. 13.d.19. Psal. 136.a.4

19

Ende gheloeft sy zijnen heerlijcken Naem eewelijck, ende alle Landen moe-

[p. 212r]

ten zijnder eeren vol worden, Amen, Amen.

20

Een eynde hebben de gebeden Dauids des soons Isai.