Den Bibel, Inhoudende dat Oude ende Nieuwe Testament (Biestkensbijbel)

¶ Den .lxxj. Psalm.

1

⁺HEEre^† ick betrouwe op v, en laet my nimmermeer te schanden worden.

+ A vers 1

† Psal. 7.a.1. 25.a.1. 31.a.1. Eccle. 2.b.12.

2

Verlost my door uwe gherechticheyt, ende helpt my wt: Neycht uwe ooren tot my, ende helpt my.

3

Sijt my eenen stercken troost derwaerts ick altoos vlieden mach, ghy die toegheseyt hebt te helpen: Want ghy zijt mijn steenrootse ende mijn Borcht.

4

Mijn Godt helpt my wt der handt des godtloosen, wt der hant des onrechtuaerdighen ende Tyrannen.

5

^* Want ghi zijt mijn toeuerlaet HEEre HEERE, mijne hopinge van mijnder ionckheyt aen.

* Psal. 22.b.10. 91.b.9. Eccle. 34.c.16

6

Op v heb ick my verlaten van moeders lijue aen,^† ghy hebt my wt mijns moeders lijf getrocken. Mijnen roem is altijts van v.

† Ierem. 1.a.5.

7

Ick ben voor velen ghelijck een wonder, maer ghi zijt mijn stercke toeuerlaet.

8

Laet mijnen mont ws roems ende ws Prijs vol zijn daghelijcx.

9

^* En verworpt my niet in mijnen ouderdom, En verlaet my niet, wanneer ic ick swack worde.

* Psal. 71.b.18.

10

Want mijne vianden spreken tegen mij: Ende die op mijn siele houden^* beraden haer met malcanderen.

* Psalm. 2.a.2.

11

⁺Ende spreken: God heeft hem verlaten, Iaghet na ende grijpt hem, want daer en is gheen verlosser.

+ B vers 11

12

Godt en zijt niet verre van my: Mijn Godt haest v, my te helpen.

13

^* Schamen moeten haer ende vergaen, die mijn siele teghen zijn, met schande ende schimpe moeten sy ouerschuddet worden die mijn ongheluck soecken.

* Psal. 35.d.26. 70.a.3.

14

Maer ick wil altoos verbeyden, ende wil altoos ws Roems meer maken.

15

Mijnen mont sal vercondighen uwe gherechticheyt: Daghelijcx dijn Heyl, die ick niet al tellen en can.

16

Ic gae henen in der cracht des HEEren HEERE: Ick prijse alleen uwe gherechticheyt.

17

God ghy hebt mi van ioncx op geleert daer om vercondige ick uwe wonderen.

18

Oock^† en verlaet my niet God in den ouderdom, wanneer ick grijs worde:^† Tot dat ic uwen arm vercondige kints kinderen: Ende uwe cracht allen, die noch comen sullen.

† Psal. 71.a.9.

† Deut. 6.d.20.

19

⁺Godt uwe gherechticheyt is hooghe ghy die groote dinghen doet. Godt wie is v ghelijck?

+ C vers 19

20

^* Want ghy laet my beproeuen vele ende groote ancxten, ende maect my weder leuendich, ende haelt my weder wt de diep-ten der aerden opwaerts.

* 1.Reg. 2.b.6. Tob. 13.a.2. Sap. 16.b.13.

21

^† Ghy maect my seer groot, ende troost my weder.

† 2.Re. 7.b.8.

22

So dancke ick v oock met Psalterspel voor uwe trouwe, mijn God, ick lofsinge v op de Herpe, ghy heylige in Israel.

23

Mijn lippen ende mijn siele, die ghi verlost hebt, zijn vrolijck ende lofsinghen dy.

24

Ooc dichtet mijn tonge daghelijcx van uwer gerechticheyt,^† want schamen moeten haer ende te schande worden, die mijn ongheluck soecken.

† Psal. 35.d.26. 40.c.15. 70.a.3 71.b.13.