Den Bibel, Inhoudende dat Oude ende Nieuwe Testament (Biestkensbijbel)

¶ Den .lxviij. Psalm.

1

Een Psalm liet Dauids, voor te singhen.

2

⁺GOdt sta op^* dat zijn vianden verstroyt worden: Ende die hem haten, voor hem vlieden.

+ A vers 2

* Num. 10.d.35.

3

^* Verdrijftse, ghelijck den roock verdreuen wort. Ghelijck dat was versmilt vanden viere, so moeten vergaen de godloose voor Godt.

* Psal. 37.c.20. Sap. 5.c.15.

4

Maer de gerechtige moeten haer verblijden, ende vrolijck zijn voor God: Ende haer van herten verhueghen.

5

Singt Gode, lof singt zijnen Name, maect dien de bane, die daer saechte henen vaert: Hy heet HEEre, ende verblijt v voor hem.

6

^* Die een Vader is der Weesen, ende een Rechter der weduwen: Hy is Godt in zijnder heyligher wooninge.

* Deut. 10.d.18. Psal. 146.b.9

7

^† Een God die den Eensamen dat huys vol kinderen gheeft, die de gheuanghen wt voert ter rechter tijt,^* ende laet de afuallighe blijuen int dorre.

† Psal. 113.a.8.

* Psal. 66.a.7.

8

^† Godt, doen ghy voor uwen volcke henen troct, doen ghy henen ghinct in de woestijne. Sela.

† Exod. 13.d.21.

9

^* Doen beefde de Aerde, ende de Hemelen dropen voor desen God in Sinai, voor den Godt, die Israels Godt is.

* Exod. 20.c.18. Iudic. 5.a.4.

10

⁺Maer nv gheeft ghy Godt eenen genadighen Regen, ende dijn Erue dat dorre is, verquict ghy.

+ B vers 10

11

Dat uwe dieren daer in woonen connen, Godt ghy lauet den ellendigen met dijne goeden.

12

De HEEre gheeft dat woordt, met grooten scharen der Euangelisten.

13

De Coninghen der heyrscharen zijn onder malcanderen vrienden, ende de huyseere deylt den roof wt.

14

Wanneer ghy te velde ligt, so blincket als de vloghelen der duyuen, die als siluer ende gout schemeren.

15

Wanneer de Almachtige onder haer Coningen ghins ende weder settet, so wort het claer, waert doncker is.

16

Den berch Gods is eenen vruchtbaren berch, een groot ende vruchtbaer geberchte.

17

Wat huppelt ghy groote bergen? God heeft lust op desen berch te woonen, ende de HEEre blijft oock altoos aldaer.

18

Der Waghenen Gods,^† is veel duysent mael duysent: De HEEre is onder haer inden heylighen Sinai.

† Dan. 7.b.10. Apoc. 5.b.11.

19

^+* Ghy zijt inde Hoochte gheuaren, ende hebt de gheuanckenis gheuangen. Ghy hebt gauen ontfangen voor de menscen, oock de Afuallighe, dat Godt de HEEre nochtans aldaer blijuen sal.

+ C vers 19

* Ephes. 4.a.8.

20

Gheloeft sy de HEEre daghelijcx, Godt leyt ons eenen last op, maer hy helpet ons oock. Sela.

21

Wy hebben eenen Godt die daer holpet, ende den HEEre HEEre, die vander doot verlost.

22

Maer Godt sal den cop zijnder vianden in stucken smijten met haren hayrschedele, die daer voort varen in haerder sonden.

23

Doch spreect de HEEre: Ick wil onder den vetten sommighe halen: Wt de diepte der See wil ick sommige halen.

24

^* Daerom sal uwen voet inder vianden bloet geuerwet worden, ende uwe honden sullent lecken.

* Psal. 58.b.11.

25

Men siet Godt, hoe ghy daer henen trect: Hoe ghy mijn Godt ende Coninck daer henen trect int heylichdom.

26

De sanghers gaen voor henen, daer na de speellieden, onder de maechden die daer bommen.

27

⁺Loeft Godt den HEEre inde vergaderinghen, voor de Fonteyne Israel.

+ D vers 27

28

Daer heerscapt^† de cleyne BenIamin

† Iudic. 20.

[p. 211r]

onder haer: De Vorsten Iuda met haren hoopen, de Vorsten Sebulon, de Vorsten Naphtali.

29

Dijn Godt heeft dijn Rijcke op gherecht, dat selue wilt ghy Godt, ons stercken, want het is dijn werck.

30

Om ws Tempels wille te Ierusalem, sullen v de Coninghen gheschencken toe voeren.

31

Scheldt dat gedierte int riet, de Rotte der Ossen onder hare Calueren, die daer vertreden om gelts wille: Hy verstroyt de volcken die daer geerne orlogen.

32

De Vorsten wt Egipten sullen comen: Mooren lant sal zijne handen wtstrecken tot Godt.

33

Ghy Conincrijcken op Aerden singet Gode, lof singhet den HEEre. Sela.

34

Dien, die daer vaert in den Hemel ouer al van aenbeghin: Siet, hy sal zijnen donder cracht gheuen.

35

Gheeft Gode de macht, zijn heerlijcheyt is in Israel, ende zijne macht in de wolcken.

36

Godt is wonderlijc in zijnen heylichdom, hy is een Godt Israels, hy sal den volcke macht ende cracht gheuen, gheloeft sy Godt.