Den Bibel, Inhoudende dat Oude ende Nieuwe Testament (Biestkensbijbel)

¶ Den .lxv. Psalm.

1

Eenen Psalm Dauids, tot een Liet voor te singhen.

2

⁺GOdt, men loeft v inder stilheyt te Sion, ende v betaeltmen geloften.

+ A vers 2

3

Ghy verhoort dat gebet, daeromme coemt alle vleesch tot v.

4

Onse misdaet druct ons herdt, wilt doch ghy onse sonden vergheuen.

5

^* Wel dien, dien ghy verkiest, ende tot v laet, dat hy woone in uwen houen, die heeft rijcken troost van dijnen huyse, dijnen heylighen Tempel.

* Ephes. 1.a.4.

6

Verhoort ons na der wonderlijcker gherechticheyt, Godt onse Heyl, ghy die zijt den toeuerlaet aller op Aerden, ende verre aen de See.

7

Die de berghen vaste settet in zijnder cracht, ende gherustet is met macht.

8

^* Ghy die stillet dat bruysen der See, dat bruysen haerder baren, ende dat rasen der volcken.

* Psal. 89.b.9. Matt. 8.c.26.

9

⁺Dat hen ontsetten die aen de selue eynden woonen, voor uwe teeckenen: Ghy maect vrolijck al wat hem verroert, beyde des morghens ende des auonts.

+ B vers 9

10

Ghy besoect dat Lant, ende wateret, ende maket seer rijck: Gods sprinckborne heeft waters planteyt, ghy laet haer coren wel geraken, want also bouwet ghy dat Lant.

11

Ghy drencket zijn voren, ende vochtet dat gheploecht is, Met regen maect ghijt weeck, ende seghent zijn vruchten.

12

Ghi cronet dat Iaer met uwen goede, ende uwe voetstappen druypen van vette.

13

De wooninghen in de woestijne zijn oock vet, dat sy druypen, ende de cleyne berghen zijn rontsom lustich.

14

De vlacke velden zijn vol Schapen, ende de valleyen staen dicke met coren, datmen iuychet ende singhet.