Den Bibel, Inhoudende dat Oude ende Nieuwe Testament (Biestkensbijbel)

¶ Den .lvj. Psalm.

1

Een gulden Cleynoot Dauids vander stommen duyuen, onder de vreemde:^* Doen hem de Philisteren grepen tot Gath.

* 1.Reg. 21.d.11.

2

⁺GOdt^† zijt my ghenadich, want menschen willen my versincken: Daghelijcx strijden sy, ende benauwen my.

+ A vers 2

† Psal. 51.a.1.

3

Mijn Vianden versincken my daghelijcx, want vele strijden teghen my stoutelijck.

Wanneer ic my vreese, so hope ic op v.

4

Ic wil Gods woort roemen: Op God wil ick hopen,^* ende my niet vreesen. Wat soude my tvleesch doen?

* Hebr. 13.a.6.

5

Daghelijcx vechten sy mijne woorden aen: Al haer ghedachten zijn, dat sy my quaet doen.

6

Sy houden te hoope ende loeren, ende hebben acht op mijne verssen, hoe sy mijn siele verrasschen.

7

Watse quaets doen, dat is schoon al vergheuen. Godt stoote sulcke lieden sonder alle ghenade tonder.

8

⁺Telt mijn vlucht, vaet mijne tranen in uwen Sack: Sonder twijfel ghy teltse.

+ B vers 8

9

Dan sullen haer mijne Vianden moeten te rugghe keeren: Wanneer ic roepe, so mercke ick, dat ghy mijn Godt zijt.

10

Ick wil roemen Gods woort: Ic wil roemen des HEEren woort.

11

^† Op Godt hope ick, ende en vreese my niet, wat connen my de menschen doen?

† Psal. 118.a.6.

12

Ick hebbe v Godt gheloeft, dat ick v dancken wil.

13

^* Want ghy hebt mijn siele vander doot verlost, mijne voeten van slipperen, dat ick wandelen mach voor Gode, int Licht der leuendighen.

* Psal. 116.b.8.