Den Bibel, Inhoudende dat Oude ende Nieuwe Testament (Biestkensbijbel)

¶ Den .lvij. Psalm.

1

Een gulden Cleynoot Dauids voor te singhen (dat hy niet en verginck)^† doen hy voor Saul vloot inde Speloncke.

† 1.Reg. 24.a.1.

2

⁺SIjt my ghenadich Godt, zijt my ghenadich, want mijne Siele betrout op v,^† ende onder de schaduwe uwer vloghelen hebbe ic toeulucht, tot dat dat ongheluck voorby gae.

+ A vers 2

† Mat. 23.d.37.

3

Ick roepe tot Godt den Alderhooch-sten, tot Godt die mijns iammers een eynde maect.

4

^† Hy seyndet vanden Hemel, ende helpt my vander versmaetheyt mijns versinckers. Sela. Godt seynt zijne goetheyt ende trouwe.

† Psal. 18.b.17.

5

Ick ligghe met mijner siele onder de Leeuwen, der menschen kinderen zijn vlammen^† haer tanden zijn glauien ende pijlen, ende haer tonghe scherpe sweerden.

† Psal. 64.a.4 Eccle. 28.c.19.

6

⁺Verheft v Godt ouer den Hemel: Ende uwe eere ouer alle werelt.

+ B vers 6

7

^† Sy stellen mijne ganghen netten, ende drucken mijne siele neder:^* Sy grauen voor my eenen Cuyl, ende vallen selue daer in. Sela.

† Psal. 35.b.7. 119.o.110. 140 a.6.

* Psal. 7.b.16 Prou. 26.c.27. Eccle. 10.a.4. Eccles. 28.a.2. 1.Hest. 7.b.10

8

Mijn herte is bereyt, God, mijn herte is bereyt, dat ick singhe ende loue.

9

^‡ Waect op mijn eere, waect op Psalter ende Herpe: Vroech wil ick opwaecken.

‡ Psa. 108.a.3.

10

HEEre ick wil v dancken onder de Volcken. Ick wil v Lof singhen onder de Lieden.

11

^† Want uwe goedertierenheyt is soo wijt als den Hemel is. Ende uwe waerheyt so wijdt als de Wolcken gaen.

† Psa. 103.b.11

12

Verheft v God ouer de Hemelen, ende uwe eere ouer alle werelt.