Den Bibel, Inhoudende dat Oude ende Nieuwe Testament (Biestkensbijbel)

¶ Den .lv. Psalm.

1

Een onderwijsinghe Dauids voor te singhen op snarenspel.

2

⁺GOdt hoort mijn gebet, ende en verbercht v niet voor mijn smeecken.

+ A vers 2

3

Merct op my, ende verhoort my, hoe ick so claghelijck versaghe ende huyle.

4

Dat de Viant so crijscht ende de godloose dringhet: Want sy willen my eenen quaden treeck bewijsen, ende zijn op my heftich gram.

5

Mijn herte beancxt hem in mijn Lijf, ende des doots vreese is op my gheuallen.

6

Vreese ende beuinghe is my aenghecomen, ende grouwel heeft my oueruallen.

7

Ick sprack: Och hadde ick vlueghelen ghelijck de Duyuen, dat ick vloghe ende yewers blijuen conde.

8

Siet, soo woude ick my verre wech maken, ende inde woestijne blijuen. Sela.

9

Ick wilde haesten, dat ick ontliepe, voor den stormwinde ende onweder.

10

^† Maect haer tonghen oneens HEEre, ende laetse ondergaen: Want ick sie vermetenheyt ende twist inder stadt.

† Gene. 11.b.7.

11

⁺Sulcx gaet dach ende nacht rontsom in hare mueren, moeyte ende aerbeyt is daer in.

+ B vers 11

12

Schade doen regeert daer in: Liegen ende bedrieghen en laet niet af van haren straten.

13

Wanneer my doch mijne Viant scheyndede, so woude ict lijden: Ende wanneer my mijn Hater ouerpochte, woude ick my voor hem verberghen.

14

Maer^† ghy zijt mijn geselle, mijn^* Plegher, ende nae Vrient.

† Psal. 38.b.12

* Regeerder. Gouuerneur.

15

Wy die vriendelijck tsamen waren tusschen ons, wy wandelden int huys Gods met hoopen.

16

De doot^† verhaestese, ende moeten leuendich inde Helle varen, want enckel boosheyt is onder haren hoop.

† Num. 16.e.32.

17

Maer ick wil tot Godt roepen, ende de HEEre sal my helpen.

18

Des Auonts, Smorgens, ende Middaechs, wil ick claghen ende huylen, soo sal hy mijn stemme hooren.

19

⁺Hy verlost mijn siele vanden ghenen die aen my willen, ende gheeft haer ruste, want haerder isser veel teghen my.

+ C vers 19

[p. 209r]

20

Godt sal hooren, ende haer verootmoedighen, die altijt blijft. Sela.

Want sy en worden niet anders, ende en vreesen Godt niet.

21

Want sy leggen haer handen aen zijne vreedsame, ende ontheylighen zijn verbont.

22

Haren mont is ghelatter dan boter, ende hebben doch Crijch inden sin: Haer woorden zijn saechter dan Olie, ende zijn doch bloote sweerden.

23

Worpt^† uwen aenuallenden noot op den HEEre, die sal v besorghen, ende en sal den rechtuaerdighen niet eewelijck in onruste laten.

† Matt. 6.c.25. Luc. 12.c.22. 1.Pet. 5.a.7.

24

Maer Godt ghy sultse onderwaerts stooten inden diepen Cuyl. De bloetghierighen ende valschen en sullen haer leuen niet ter helft brenghen. Maer ick hope op v.