Den Bibel, Inhoudende dat Oude ende Nieuwe Testament (Biestkensbijbel)

¶ Den .lij. Psalm.

1

Een onderwijsinge Dauids voor te singhen,

2

Doen^† Doeg de Edomiter quam, ende seyde Saul aen, ende sprac: Dauid is in Abimelechs huys ghecomen.

† 1.Reg. 22.b.9.

3

⁺VVat pocht ghy dan, ghy Tyran, dat ghy cont schade doen? So doch Gods goetheyt noch daghelijcx duert.

+ A vers 3

4

Vwe tonge staet na schaden, Ende snijt met luegenen, als een scherp scheermes.

5

Ghy spreect lieuer dat boose, dan dat goede: Ende lieuer valsch dan recht. Sela.

6

Ghy spreect gheerne al wat tot verderuen dient, met valscher tonghen.

7

Daerom sal v God ooc gants ende heel verstooren, ende in stucken slaen, ende wt der Hutten rucken, ende wt den lande der leuendighen wtroeyen. Sela.

8

Ende de gherechtighe sullent sien ende haer vreesen, ende sullen om hem lacchen.

9

Siet, dat is de man, die God niet voor zijnen troost en hielt,^† maer verliet hem op zijnen grooten rijcdom, ende was machtich om schade te doen.

† Psal. 49.a.7. Luc. 12.b.19. Eccle. 5.a.1.

10

Maer ick sal blijuen ghelijck eenen groenen Olijfboom int huys Gods: Verlate my op Godts goetheyt altoos ende eewelijck.

11

Ick dancke v eewichlijck, want ghy condt het wel maken: Ende wil verbeyden op uwen Naem, want uwe heyligen hebbender vruechde aen.