Den Bibel, Inhoudende dat Oude ende Nieuwe Testament (Biestkensbijbel)

¶ Den .xlix. Psalm.

1

Eenen Psalm der kinderen Korah, voor te singhen.

2

⁺HOort toe alle Volcken, mercket op, alle die in deser tijt leeft.

+ A vers 2

3

Beyde ghemeyn man ende Heeren, beyde rijcke ende arme met malcanderen.

4

^† Mijnen mont sal van wijsheyt spreken, ende mijn hert van verstant segghen.

† Psal. 78.a.2. Mat. 13.d.35.

5

Wy willen een goede spruecke hooren, ende een fijn gedicht op der Herpen spelen.

6

Waerom soude ic my vreesen in boosen daghen, wanneer my de misdaet mijnder ondertreders omringt?

7

^† Die haer verlaten op haer goet, ende pochen op haer groote rijcdommen.

† Psal. 52.b.9. Eccle. 5.a.1. Luc. 12.b.19.

8

Niemant en can doch zijnen broeder verlossen: Noch God yemant versoenen.

9

^* Want het coste te vele haer siele te verlossen, dat hijt moet laten aenstaen eewichlijck.

* Mat. 16.d.26.

10

Oft hy oock alschoon langhe leeft, ende den Cuyl niet en siet.

11

Want^† men sal sien, dat sulcke wijse doch steruen, soo wel als de Dwasen ende Narren vergaen^* ende moeten haer Goet anderen laten.

† Eccle. 2.b.14.c.16. 3.c.19. Iob. 21.c.23.

* Eccl. 11.b.10.

12

⁺Dat is haer herte, dat haer huysen dueren altoos: Haer Wooninghen blijuen voort ende voort, ende hebben groote eere op Aerden.

+ B vers 12

13

Nochtans en connen sy niet blijuen in sulcker weerde: Maer moeten daer af, als een Vee.

14

Dit haer doen is enckel dwaesheyt: Nochtans louent haer Nacomelinghen met haren Monde. Sela.

15

Sy liggen inde Helle ghelijck Schapen, de doot knaechtse:^† Maer de vroome sullen gants gheringhe ouer haer heerschen, ende haer pochen moet vergaen, inder Hellen moeten sy blijuen.

† Malac. 4.a.3.

[p. 208r]

16

⁺Maer Godt sal mijn Siele verlossen wt der Hellen ghewelt, want hy heeft my aenghenomen. Sela.

+ C vers 16

17

^* En laet v niet verbijsteren oft een Rijck wordt: Oft de Heerlijckheyt zijns huys groot wort.

* Psal. 37.a.1.

18

^† Want hy en sal in zijn steruen niet mede nemen, ende zijn Heerlijcheyt en sal hem niet nae varen.

† Iob. 1.c.21. 27.c.19. Eccle. 5.b.14. 1.Tim. 6.b.7. Eccle. 11.b.10.

19

Maer hy troost hem deses goeden leuens, ende prijst het, wanneer een na goede daghen poocht.

20

So varen sy haren Vaderen na, ende en sien dat Licht nemmermeer.

21

Summa: Wanneer een mensche inder weerdicheyt is, ende en heeft des gheen verstant, soo vaert hy daer af als een Vee.