Den Bibel, Inhoudende dat Oude ende Nieuwe Testament (Biestkensbijbel)

¶ Den .xlviij. Psalm.

1

Een Psalm liedt der kinderen Korah.

2

⁺GRoot is de HEERE, ende hooghe beroemt inder stadt ons Gods, op zijnen heylighen Berch.

+ A vers 2

3

Den Berch Sion is gelijck een schoon spruytken, dies hem dat gantsche lant troostet. Aen de sijde teghent Noorden leyt de^* stadt des grooten Conincx.

* Hebr. 12.d.22. Apoc. 21.a.2.b.10.

4

God is in haer Palleysen bekent, dat hy de beschuttinghe sy.

5

Want siet^† Coninghen zijn verghadert, ende met malcanderen voorby ghetrocken.

† 2.Pa. 20.a.1.

6

Sy hebben haer verwondert doen sy sulcx saghen: Sy hebben haer ontstelt ende zijn^† ghestortet.

† Van bouen afghestooten.

7

Beuinghe is hen aldaer aengecomen, ancxt, als een die baert.

8

Ghy breect de Schepen inde See in stucken, door den Oosten wint.

9

⁺Also wy ghehoort hebben so sien wijt inde stadt des HEEren Sebaoth, inde stadt ons Godts: Godt onderhoudt de selue eewelijck. Sela.

+ B vers 9

10

Godt, wy verwachten uwer goetheyt in uwen Tempel.

11

Godt, ghelijck uwen Naem, soo is oock uwen roem totten eynde der werelt toe. Vwe rechter hant is vol gherechticheyts.

12

^* Den Berch Sion verhueghe hem, ende de Dochteren Iuda zijn vrolijc om uwer gherichten wille.

* Psal. 97.b.8.

13

Maect v om Sion, ende omuanctse: Telt haer Torenen.

14

Legt neersticheyt aen haer Mueren, ende verhoocht haer Palleysen: Op datmen daer af vercondighe byde Nacomelinghen.

15

Dat dese Godt onse Godt sy, altoos ende eewelijc, hy leydet ons als de iuecht.